英超雙雄美國繼續開騷

猪拉多纳

國際冠軍盃好波停不了，今晚上演B組賽事，英超兩大名牌球會曼城同利物浦分途出擊，「藍月亮」會喺匹茲堡鬥AC米蘭，而利物浦則前往芝加哥會師奧林比亞高斯，不過紅藍兩軍近況一個天一個地，要雙雙揚威花旗恐有一定難度。
曼城二線兵搏命攞A

「藍月亮」曼城於B組首度出擊，喺美國匹茲堡亨氏球場出戰褪色勁旅AC米蘭。雙方近日頻頻踢熱身賽，同樣以主力配副選列陣，但結局差天共地，相信曼城為開拓美國市場，勢必贏波省招牌，客勝有計。

(有線61及201台周一凌晨4時直播)

曼城上場熱身賽清風送爽以4比0大勝肯薩斯體育會，狀態有目共睹，相反AC日前喺國冠盃B組首仗出戰希臘強隊奧林比亞高斯，新帥恩沙基試陣之餘，亦不忘用薩卡度、阿爾拉米、柏仙尼、邦利拿等老將帶住新人，可惜都係跟唔上奧軍嘅比賽節奏，尤其係落後嗰陣，面對對手銳利反擊條防線已經散晒，最終慘吞三蛋，搞到恩沙基上任後首嘗敗績。
AC未執掂「巴神」冇支援

當然呢啲季前賽眾將都未操弗，不能因一場大敗而睇死恩沙基，但佢亦面對巧婦難為無米之炊，高層加利安尼講到明，一日未能放走高薪冗員羅賓奴減磅，都唔使旨意有錢買到阿利斯奧施斯或迪斯馬利等心儀目標，加上中場兼隊長蒙杜利禾仲養緊傷，令球隊喺轉守為攻方面唔多暢順喇，就算今仗或有「腦殘」巴洛迪利倒戈亦唔幫得多。

其實曼城亦有阿古路、薩巴列達、高柏尼等世盃國腳未歸隊，仲有箭頭尼格度重創抖兩至三個月，但佢哋勝在兵多將廣，唔單止冇份踢世盃嘅捷西斯拿華斯、祖維迪、高拉洛夫等猛將壓陣，外借期滿歸隊嘅翼鋒史葛冼佳亞，近期喺熱身賽非常搏命，加埋上仗對肯體會埋齋嘅尼日利亞新星伊希納丘，乃上年世少盃冠軍功臣兼金球獎得主，前途無限，呢類邊緣人為博留隊，必定施展渾身解數，「藍月亮」亦希望藉國冠盃喺美國省靚塊招牌，整定AC冇運行，客勝咪錯過。