紅軍未弗難o趙奧林比亞高斯

猪拉多纳

英超球隊利物浦喺芝加哥軍人球場迎戰希臘代表奧林比亞高斯，「紅軍」出售射手蘇亞雷斯後，立即補充幾位新兵，整體人腳實力看似有增無減，但要留意太多新球員加盟，需要時間磨合，現時只係季前熱身賽，恐怕仲未建立到默契。奧林比亞高斯上仗大炒ＡＣ米蘭，攻守有序相當勇銳，受讓要讓球客勝。

（有線61及201台周一早上6時直播）
阿蘇離隊陣容有排砌

利物浦賣蘇亞雷斯畀巴塞，用該筆轉會費換來前鋒列基林拔、拿沙馬高域、中場拉爾拉拿、安利簡恩，中前場人腳有更多選擇，長遠來講的確係好事。領隊羅渣士首要工作就係透過熱身賽，考察一班新兵表現，從而制訂最佳陣容。「哨牙蘇」離隊對利物浦進攻影響甚大，加上新球員人數亦多，睇怕羅渣士需要花一段時間，先至可以執掂球隊。

事實上，「紅軍」近期熱身賽演出乏善可陳，列基林拔、安利簡恩表現平庸，拉爾拉拿操練時整傷膝部韌帶，將錯過英超首３輪對修咸頓、曼城及熱刺。預料由賓菲加來投嘅新星拿沙馬高域今仗會擔正，但呢位20歲小將可以為球隊帶來幾大貢獻，仍屬未知之數，切勿過分樂觀。

希超冠軍奧林比亞高斯擁有希臘球隊一貫硬淨防守，仲有沙維奧拿等高質進攻球員，行軍速度快，上仗大勝ＡＣ米蘭3比0，合情合理。奧軍參加國冠盃，唔止為操起狀態迎戰聯賽備戰，仲係為歐聯備戰，力爭擊敗列強，提升信心，態度特別認真，可力保不敗。