維迪倒戈鬥朗尼 紅魔殺氣盛得米

猪拉多纳

國際冠軍盃A組次輪分組賽，曼聯同國際米蘭會師美國華盛頓。首次倒戈嘅前曼聯隊長尼曼查維迪，遇上講明要以表現爭取隊長臂章嘅朗尼，兩人今場正面對決，必定好戲連場。不過從投X角度出發，衡量過兩軍近況同球員狀態後，識揀，一定揀1.64倍「紅魔」主勝！

（有線61及201周三早上7:00直播）

曼聯由荷蘭名帥尹戈爾接手後，霸氣重現，繼美國之旅首站大炒洛杉磯銀河7:0，日前喺國際冠軍盃首輪分組賽鬥羅馬，開波早段雖被對手狂攻猛炸仍保持不失，更連環攻陷羅馬大門，半場遙遙領先3:0。若非尹帥喺換邊後收起晒朗尼、韋碧克同桑馬達，調入大量後備，「雌狼」要追番兩球簡直天方夜譚。
「聰明仔」做隊長逼朗尼發奮

尹帥上場突然任命湯卡華利做隊長，嚇到唔少擁躉眼都凸埋，有指尹帥呢招其實一石二鳥，可以鼓勵被狂踩唔夠班嘅「聰明仔」，亦激發朗尼對爭取做「紅魔喼頓」鬥志。姑勿論尹帥係咪咁高明，但「魔童」重返箭頭位置後，演出確實生龍活虎，兩場夾埋踢咗90分鐘取得4個入球同1次助攻，唔到你唔服，今場有佢繼續同桑馬達、韋碧克合組進攻三叉戟，入波易過食生菜。
國米畀半力皇馬玩殘

國米上場硬撼皇家馬德里，「銀河艦隊」嘅C朗、賓施馬同基迪拉等大批常規正選缺陣，可以話讓晒車馬炮，但都被加里夫巴利玩殘，直到下半場皇馬調走幾名主將離場，至能夠入波追平再射贏12碼。雖然尼曼查維迪呢場踢落對辦，獲意大利傳媒激讚穩如磐石，佢今場首次倒戈「紅魔」，唔使問肯定搏晒老命，之不過班隊友表現咁唔爭氣，怕且好難單天保至尊咯。
Data King：4度交手全開細

‧雙方過往4度對壘，曼聯取得2勝2和不敗成績。

‧曼聯王牌朗尼連續2場梅開二度。

‧兩隊歷來4次對碰，全部開出入球細及入球雙。
乜都玩錦囊：紅魔搶韁博先入波

名帥尹戈爾接掌後，曼聯上季頹風一掃而空，美國之旅踢咗2場勁入10球，火力絕對唔嘢小。不過「紅魔」過往4次對住國米都開入球細，今場入球大細好難揀，既然曼聯踢法搶韁，美國兩戰都成功入波先，今場不妨再追曼聯「第一隊入球」。