歐洲新球季開車喇!

猪拉多纳

歐洲波返嚟喇！世盃熱潮過後，經過一輪小休，今周開始歐洲各大小聯賽陸續回歸，各位粉絲準備好未呢？今晚除咗有俄羅斯超級聯賽隆重登場外，球迷熟悉嘅德乙及法乙亦揭開戰幔，新球季究竟有乜好路推介，講多無謂即刻帶你去各站睇真啲！
杜塞爾多夫上盤有回布

德乙今晚開鑼，揭幕戰由杜塞爾多夫主場迎戰上季德甲分子布倫瑞克。杜塞爾多夫今夏獲得多名強援加盟，劍指升班，相反布倫瑞克降班後失血嚴重，高下立見，杜塞爾多夫只係小讓平半，識揀嘅，梗係杜軍上盤啦！

（有線64、203及18台周六凌晨2時30分直播）

上季僅排第六無緣升班嘅杜塞爾多夫，今季決心捲土重來；上季以外借身份轟入12球嘅陣中神射手賓斯卓普正式加盟，加上三名德甲新星艾維華、贊普柏路及烏拿史杜爾加入，令佢哋如虎添翼，連同世盃澳洲國腳賀路雲亦決定留隊，杜塞爾多夫嘅人腳質素，於德乙可謂數一數二，況且佢哋喺季前熱身賽頻響勝鼓，成班球員極速上力，難怪被視為升班熱門之一。

另一邊廂，經過喺德甲奮戰一季，但成績實在唔多掂，最終冇得留低嘅布倫瑞克，新球季面臨主力流失呢個嚴重問題，唔單止波斯尼亞潛力新星比卡斯錫跳船到德甲球隊賀芬咸，連上季首席射手甘比拿都轉戰土超嘅卡拉布克，以致布倫瑞克元氣大傷，睇嚟教練拿碧拿治有排先執番好隊波。
布倫瑞克近8對賽未贏過

況且布倫瑞克啱啱回歸德乙，點都需要一啲時間適應比賽節奏，加上近八次對杜塞爾多夫，布倫瑞克竟錄得五和三負未嘗一勝劣績，真係未踢已經腳軟。依斯維之見，杜塞爾多夫今場似係坐和望贏格局，有埋主場之利，小讓平半稱得上係筍盤，不妨揀上盤博佢哋打響頭炮。