魯賓卡山打殘斯巴達

猪拉多纳

俄超雙雄埋牙！

今晚新一季俄超正式開咧，頭炮有魯賓卡山喺主場迎戰另一傳統豪門莫斯科斯巴達！雖然兩隊都係歐洲賽常客，不過佢哋上季雙雙「甩轆」失落歐戰資格，今季目標梗係重返呢個大舞台啦。兩隊比較，相信以較「齊腳」兼有主場之利嘅魯賓卡山秤先，有力砌低有舒洛哥夫受傷嘅莫斯科斯巴達，平手盤當然要1.86倍主勝。

（開賽時間：周六凌晨0:00）
新波衫Sharp醒 目標重返歐洲賽

魯賓卡山今季大舉增兵，由Benz贊助嘅佢哋，早前特別舉行「一石二鳥」嘅新季球衣發布會，由簡奴尼哥夫、奧斯多耶夫等新援充當模特兒示範新衫，非常Sharp醒，由阿馬卡加盟嘅簡奴尼哥夫，就大談自己喺新東家嘅目標：「魯賓卡山今季最大目標就係取得歐洲賽資格，我亦會盡力完成呢項使命，至於開咧戰嘅目標梗係贏波啦！」似乎好有火咁噃。中場莫基利維斯更喺同一場合獲頒去季「最佳入球獎」，今場肯定會更加搏命，爭取入多粒靚波！新仔夠鬥心、原本班底又夠質素，開咧戰照計可以喺擁躉面前搶分威番次嘅。

至於莫斯科斯巴達今季雖獲前巴素利主帥馬列耶堅入主，但係今場情況仍然不容樂觀，除咗耶帥加盟冇耐，即使日操兩課，都未必咁快可以令球員融入到自己嘅戰術體系之外，最慘嘅係今夏焦點收購舒洛哥夫啱啱做完手術，要休戰一段時間，就算有上季外借畀阿仙奴嘅卡斯唐「返歸」，以佢哋季前賽5戰不勝兼只入3球嘅劣績，今場開咧戰睇怕好難畀到咩驚喜球迷，想有分落袋都難喇。