曼聯借勢打沉佢！

猪拉多纳

銀河艦隊擱淺 戰力減半

今晚國際冠軍盃A組尾輪爆發「迷你版歐聯星戰」，「紅魔鬼」曼聯於美國安阿伯密西根球場火併「銀河艦隊」皇家馬德里。兩軍星光熠熠，陣勢堪比歐聯大戰，有傳皇馬王牌C朗或復出倒戈，不過佢哋晨早已經出線無望，撞正喺新帥尹戈爾調教下戰意爆燈嘅曼聯，「銀河艦隊」因擱淺戰力減半，仲要讓波絕對唔合理，梗係捧受讓嘅紅魔讓球主勝啦！

（有線61及201周日凌晨4時直播）
C朗或復出 無濟於事

雖然皇馬頭號王牌C朗有傷在身，但佢已恢復進行一定強度訓練，主帥安察洛堤喺記招亦露口風，話可能會畀呢位葡萄牙萬人迷喺今仗亮相，等佢可以倒戈曼聯堅有睇頭。不過貴為上屆國冠盃盟主，皇馬仍有新加盟嘅「J神」占士洛迪古斯、卻奧斯等球星仍未歸隊，除咗冇踢世盃叉足電嘅「大聖爺」加里夫巴利弗爆外，一眾西班牙頹爆國腳如沙比阿朗素、沙治奧拉莫斯、卡斯拿斯都抱住寓賽於操嘅心態，難怪連續兩仗都贏唔到波，搞到提早衞冕失敗。

上季曼聯於英超排第7過終點，搞到新球季冇得踢歐洲賽認真失威，因此國冠盃成為佢哋於新季唯一可同歐洲列強交鋒嘅機會，適逢喺荷蘭名帥尹戈爾新官上任，面子大過天，當然希望藉住國冠盃一吐烏氣。
朗尼爭隊長 實搏甩髀

紅魔除新援安達靴里拉極速適應外，星級戰將「魔童」朗尼、桑馬達等亦逐漸上力，其中「魔童」因為要力爭成為新隊長，戰意十足肯定搏甩髀，就算熱身賽場合都會加多兩錢肉緊，況且佢哋贏波就肯定入決賽，面對戰意成疑嘅皇馬竟然仲有得受讓咁筍，讓球主勝咪錯過。