阿仙奴搶胡降摩

猪拉多纳

揼本擴軍 酋長盃志在必得

阿仙奴今夏一反常態，竟然喺開季前一個月就開始積極擴軍，睇落比起以往幾年準備更為充足，咁樣唔單止加強板櫈深度，更令舊有班底同新球員磨合得更快。酋長盃連續兩日都有比賽，好考球隊嘅兵源調動，東道主「兵工廠」喺呢方面同今場對手摩納哥相比，似乎較有優勢，主W值得捧場﹗

（TVB 301周日晚11時20分直播）

喺上季未打破八年錦標荒、攞得足總盃之前，阿仙奴成日都畀人笑話酋長盃係佢哋每季唯一嘅獎盃，但其實「兵工廠」喺09年同10年攞過兩年冠軍後，近兩屆都攞唔到。不過科娜今年都對阿仙奴幾有信心，要重奪呢個盃應該唔係難事，難得「鐸叔」雲格肯揼本買人，仲要係即食球員：阿歷斯山齊士、迪保治、奧斯賓拿，只得哥林張伯斯一個係「幼齒」，真係一地眼鏡碎。
人腳充裕冇德國兵照殺

「兵工廠」今場有奧斯爾、普多斯基同梅迪薩卡呢三位德國世盃國腳放緊大假，新買入嘅門將奧斯賓拿亦因傷缺陣，不過買咗咁多人嘅阿仙奴仍有足夠兵力應付連續兩日嘅酋長盃賽事，前鋒冇基奧特都仲有啱啱回收返嚟嘅祖爾甘保。呢位不斷被外借嘅「人球」喺上季幫奧林比亞高斯勇奪聯賽冠軍，喺世盃更幫哥斯達黎加成「巨人殺手」，出色嘅表現終令雲格回心轉意收返佢返嚟，咁難得捱到出頭天，呢位22歲後生仔一定會更加搏命，確立自己喺隊中嘅位置。
摩納哥閂水喉濕滯

摩納哥就濕滯啲嘞，以往呢支富豪球隊增兵勁闊綽，今夏竟然「閂水喉」一啲動作都冇，只係搵嚟前士砵亭主帥查迪姆接手球隊，更賣走埋哥倫比亞新星占士洛迪古斯，另一主將法卡奧又未知狀態fit唔fit，今仗上陣成疑。既然阿仙奴兵源好過對手，又有主場球迷嘅支持，主W捧得過！