再追海登咸有回布

猪拉多纳

根據經驗，喺季初經常會殺出一啲「神奇球隊」，今季德乙新升班嘅海登咸喺首仗即驚喜贏波。皆因呢類球隊難得升班，士氣肯定高昂，加上底細比較「神秘」，趁對手未摸清楚佢哋，成功偷雞。海登咸今晚作客由德甲降班嘅布倫瑞克，繼續被睇低一線，有得受讓下值得再追捧，支持海登咸讓球客勝。

（有線64、203、18台周六晚9時30分直播）

海登咸保留上季奪得德丙冠軍嘅班底，默契及凝聚力十足。事實上，呢種細球會往往靠打士氣及拚勁，球隊以不變應萬變嘅策略成功，上仗以2比1擊敗FSV法蘭克福，兩位入波功臣舒拿達拿及柏德列邁亞都係球隊近年骨幹人物，證明只要有鬥心，靠「德丙人腳」一樣掂。海登咸取得好開始，無疑為球隊打下強心針，更難咬得入佢哋。趁季初海登咸「評級」未被調升前，應會有較多場次獲受讓，屬於搵食良機。
布倫瑞克瓣瓣唔老利

布倫瑞克降落德乙後，唔少高質素主力離隊，包括上季首席射手甘比拿，以及中場大腦比拿拉比，實力肯定受削，唔好因為有上季德甲球隊之名，而高估佢哋。另外，布倫瑞克兩位常規球員賀查舒捷特、奧爾夏都有傷在身。種種不利因素纏繞下，實在讓唔起海登咸。