中央陸軍斯巴達傷鋒冇攻細

猪拉多纳

今日晏晝俄超爆發「莫斯科打吡」，由莫斯科中央陸軍主場硬撼莫斯科斯巴達。兩軍計「卡士」同號召力肯定夠晒，奈何就齊齊患上大傷「鋒」，雙方最做得嘢嘅射手杜姆比亞同迪斯奧巴都未擺脫傷患缺陣，睇怕1.85倍入球細走唔甩。

（now671台周日下午5:30直播）

陸軍新季氣勢如虹，開咧後3戰全勝，不過上仗以1:0砌低泰歷克場波嘅代價認真大，射手杜姆比亞勇戰受傷，軍醫證實呢位科特迪瓦射手整親大腿筋，起碼要休戰3至4個星期。

陸軍名將基列真高前日向《俄羅斯郵報》表示，杜姆比亞基本上係陸軍唯一正宗射手，預期教練施盧斯基喺排陣上實非常頭痛。唔淨止咁，會方仲喺上周四將翼鋒史堤芬蘇巴賣去賀芬咸，瑞典中場拉斯慕斯伊姆仲思鄉思到病埋，霎時間冇咗隻翼同射手，鋒力肯定大受影響。
雙方射手齊打柴

作客嘅斯巴達亦唔好得幾多，新季已經有4球進帳嘅首席射手迪斯奧巴，上仗鬥卡斯洛達一役踢咗唔夠半粒鐘就撞傷臀部退下火線，教練梅勒耶堅話呢位射手同受腳傷困擾嘅中場法根度哥斯達都會缺陣，另一中場大將祖拉度又話要返馬體會添。佢哋啱啱先吞完卡斯洛達4蛋，今仗冇埋迪斯奧巴，梅勒耶堅肯定想穩穩陣陣求1分交差，主隊冇火、客軍又唔慌會進取，點睇都唔似多波入喎！