開咧王換偈戰車撞散般尼

猪拉多纳

聯賽第1擊 近12季11W

今晚「英超星期一」般尼主場對車路士，睇落唔難揀，熱捧車仔1.94倍「讓球客勝」有着數。雖然般尼升班前喺英冠幾守得，但車仔對上12季有11次聯賽首戰贏波，絕對係英超「開咧王」，況且般尼領隊桑恩戴治都承認未完成組軍，點打呀？（now621台周二凌晨3:00直播）
寸王大換血 新兵全部正貨

車仔上季得聯賽第3名，「寸王」莫連奴當然唔滿意，所以喺今季進行大清洗，前鋒伊度奧、丹巴巴亞、中場林柏特、後衞大衞雷斯同艾殊利高爾全部走人，但加入嘅射手迪亞高哥斯達、中場法比加斯同左閘菲臘路爾斯全部係好嘢，加埋門將泰拔高圖爾斯借用期滿回歸，前鋒杜奧巴受傷後又神奇康復話踢得，牌面當然贏晒啦！

不過咩都假，車仔開咧戰特醒先至值得捧場，對上12個球季，佢哋喺聯賽首戰有11勝1和，只得11年作客以0:0打和史篤城失手，既然今季車仔前線牌面唔曳，唔似會失威囉。其他唔講，淨係睇車仔被足智彩捧成2.75倍英超冠軍大熱門，就知佢哋被睇好啦，最近莫連奴仲話，依家車仔嘅陣容同條件，可以稱霸英超10年，今場贏得唔好睇，實畀人寸爆。
般尼莫財 組軍仲未掂

對家般尼上季喺英冠得亞軍，而且攻守兩方面都唔錯，可惜領隊桑恩戴治完全冇英超領軍經驗，佢喺2012年執教般尼前，只係帶過屈福特一季。而且般尼班費有限，升班後只能夠執平價貨，或者免費簽中場馬菲泰萊。近日桑恩戴治更自爆，其實組軍未完成，希望可以喺轉會市場關閉前執多啲好嘢，咁嘅身世，唔似阻到車仔大勝喎！
Data King：般尼熱身賽半場4連細

‧般尼上季英冠失波最少，46戰失37球。

‧般尼連續4場熱身賽開半場細。

‧車路士上季英超失球最少，38戰失27球。

‧車路士開季前8場熱身賽有6場至少入2球。
乜都玩錦囊：車仔開波狂攻捧半勝

車路士上季失落聯賽錦標，主要係因為前鋒唔掂，伊度奧同費托都冇穩定入球數字。今季唔同喇，新簽嘅迪亞高哥斯達應該好適合車仔踢法，而且回歸英超嘅法比加斯要證明自己，相信一開波就會狂攻般尼，如果怕「讓球客勝」唔夠穩，1.73倍半場勝都值得吼實。