半場和袋住仙

猪拉多纳

比錫達斯主場硬淨估佢唔到

歐聯附加賽首回合今晚爆發，最矚目戲碼當然係英超勁旅阿仙奴作客土超球隊比錫達斯。阿仙奴唔單止眾將未入局，防線主力哥斯尼及基蘭基比斯仲可能倦勤添！隨時保守行先，況且殺入分組賽連電視轉播費等收入講緊係億億聲嘅收益，加上土耳其球隊主場作戰一向極難纏，因此阿仙奴初段肯定唔敢冒進，既然勝負難料，不如半場和都袋住先啦！

（有線61及201台周三凌晨2時45分直播）
阿仙奴防線有隱憂

以波論波阿仙奴梗係贏成條街，但大家唔好忘記依家仲係季初階段，眾將未上力好正常，兵工廠喺英超開咧日幾經辛苦先至擊敗弱旅水晶宮，以往嘅華麗組織唔見晒，除咗艾朗藍斯稍為似樣外，辛迪卡索拉、韋舒亞、基奧特等攻擊手都唔弗，新兵阿歷斯山齊士同隊友默契未足，好多時要單打獨鬥，整體進攻唔多流暢。

最弊係防線制空力弱嘅老問題故態復萌，兩名後衞哥斯尼及基蘭基比斯亦有傷在身，主帥雲格原本諗住畀梅迪薩卡、奧斯爾、普多斯基3名德國世盃國腳抖多一周，但賽前亦改口風話要睇情況而定，睇嚟德國三寶至少會後備待命，如果哥斯尼唔掂，唔排除雲格會焗出未弗嘅梅迪薩卡，都咪話唔牙煙。
丹巴巴亞狀態弗爆

另一邊廂，比錫達斯今夏獲得前車仔箭頭丹巴巴亞加盟，攻力大增，呢位塞內加爾射手上圈次回合對飛燕諾大演帽子戲法，加上比軍已經踢咗兩場歐聯第3圈，狀態明顯更勝一籌，鑑於人哋咁弗，自己防線又唔多穩陣，雲格冇理由冒險鬥攻咁蠢，今仗極有可能用硬淨防中法米尼代替韋舒亞，拍住隊長阿迪達做掃蕩，加埋艾朗藍斯瞻前顧後，以鞏固防線嘅穩定性。

由於殺入歐聯分組賽連電視轉播費，將有高達3千萬歐元（約3.1億港元）收入，而今仗只係首回合，阿仙奴為「錢途」着想，難免步步為營，初段隨時處於膠着狀態，要預測勝負幾傷腦筋，反而半場和有成2.2倍，未完場已經袋咗先，實在非常吸引。