皇馬半場勝好路

猪拉多纳

「天使」歸位 433強攻馬體會

西甲回歸前，先有西超盃做前菜！今屆西超盃上演首都打吡兼歐聯決賽翻版戰，今晚首回合由西盃冠軍皇馬主場火併聯賽盟主馬德里體育會，有傳皇馬復用「天使」迪馬利亞代替啱啱來投未夾熟嘅「J神」占士洛迪古斯，乘住死敵馬體會變動太大磨合需時，兩大王牌C朗及加里夫巴利勢必一開波即撳住搶，斯維力撐皇馬半場主勝。

（now 632周三清晨5時直播）

皇馬上季連擸西班牙盃及歐聯，新球季劍指所有錦標，不惜斥巨資買入喺世盃光芒四射嘅「J神」及卻奧斯，其中身價達8,000萬歐元嘅「J神」被寄予厚望，可惜呢位哥倫比亞新星喺早前歐超盃擊敗西維爾之役表現麻麻，主帥安察洛堤深明「J神」仍未融入球隊，又唔想咁快拆散上季成功嘅433陣式，《阿斯報》頭條指出正選唯一懸念：用「J神」定「天使」？「天使」剛喺熱身賽對費倫天拿助攻C朗入波，同其他隊友夾慣夾熟，有傳安帥喺首回合將以不變應萬變，先用迪馬利亞打正選。
「床單兵團」拆骨有排執

「銀河艦隊」可以用番舊有班底，相反「床單兵團」馬體會被迫大變身。睇番上季歐聯決賽馬體會加時不敵皇馬嘅出場球員，迪亞高哥斯達、泰拔高圖爾斯、菲臘路爾斯、韋拿、阿祖安盧比斯等全數離隊，雖然補充番文迪蘇傑、基沙文、贊奧拿克、施古爾拉、魯爾占美尼斯等質素唔曳嘅新血，但變動咁大，點都需要時間磨合，特別係教頭施蒙尼以防守逼搶為主嘅戰術，對中前場球員互相補位嘅意識要求極高，依家佢哋默契未夠猶如新埋班，隨時開波初段陣腳未穩，就畀皇馬兩大王牌C朗及加里夫巴利嘅快攻打殘，主W得1.38倍冇肉食，不妨博有1.88倍嘅半場主勝。