皇馬強鋒摧毀馬體會

猪拉多纳

西超盃首回合開戰！

西班牙超級盃今晚開騷，上屆西盃盟主皇馬喺巴拿貝出戰，同上季西甲王者馬體會合演首回合賽事。「銀河艦隊」今夏收購卻奧斯同占士洛迪古斯後，砌到條靚絕同花順，超強鋒力喺歐超盃有目共睹，相反馬體會星散，鋒線同防線被迫「大洗牌」，新舊球員唔夠默契，咁梗係撐皇馬2.15倍「讓主」啦！

（now632台周三清晨5:00直播）

「銀河艦隊」上星期喺歐超盃兩球淨勝西維爾，三大殺手C朗、加里夫巴利同賓施馬，同兩名新援占士洛迪古斯同卻奧斯合作勁有火花，盡顯同花順級數嘅進攻火力。其中卻奧斯除咗畀西班牙傳媒封為「皇馬凱撒」，就連C朗同沙治奧拉莫斯兩名皇馬大佬都點名激讚佢添。
皇馬同花順勁夾

咪睇皇馬幾日前熱身賽輸畀費倫天拿，以為佢哋「海鮮波」，實情係主帥安察洛堤僅以「二隊」應戰，下半場仲換入一大批年輕新丁，戰果根本唔能夠作準。再者，今場係「皇馬同花順」喺巴拿貝首度亮相，佢哋肯定盡騷哥利，實行幫「銀河艦隊」喺首回合整多兩粒打底。

仲有，皇馬羅致哥斯達黎加門將基羅拿華斯後，日前放走咗上季聯賽孭重飛嘅迪亞高洛迪古斯，令卡斯拿斯重奪首席門神位置重現一線生機，預計今晚擔正把守最後一關嘅「聖卡斯」，實會飛到盡爭取零封對手。
馬體會星散有排執

相比「聖卡斯」砌盡博取安帥好感，馬體會門將位置就陰功咯，新世代鋼門泰拔高圖爾斯被車路士回收後，球會雖然買咗贊奧比歷做替補，可惜佢哋級數明顯有別，情況同左閘主將菲臘路爾斯被撬走後，只羅致CF格蘭納達後衞施古爾拉頂檔一樣，防線隨時走晒樣。

防線唔掂，鋒線一樣係馬體會嘅「重災區」，上季孭重飛嘅迪亞高哥斯達、阿祖安盧比斯同韋拿排隊走人，補充番文迪蘇傑、基沙文同魯爾占美尼斯，可惜佢哋3個夾咗冇耐，要發揮最強威力怕且都要一段時間，試問點威脅到皇馬條星級防線喎，攻不銳時守不穩，今晚造訪巴拿貝，最低限度輸兩粒啦！
Data King：皇馬開大比率逾7成

皇馬上季主場踢盃賽冇甩拖，包括西盃及歐聯在內取得11勝。

馬體會上季首、次席射手迪亞高哥斯達同韋拿已經離隊。

2.5球中位數計算，皇馬上季開大比率高達75%。