漢諾威死球煞食打老虎

猪拉多纳

今晚早場直播仲有漢諾威主場鬥史浩克04，史浩克名氣大，不過目前狀態不足人腳唔齊，相反漢諾威季前表現Sharp醒得多，黑柴相信漢諾威可憑死球戰術打老虎，主場受讓平半撐下盤。

（有線61及201台周六晚9時30分直播）

漢諾威今季有中場領袖侯斯迪離隊，不過呢位匈牙利國腳去季所見速度已減弱，佢一直負責處理大部分死球，但黑柴認為球隊嘅前史浩克左閘彭達死球功夫更勝一籌，何況球隊今夏引入埋另一死球專家清武宏嗣，令佢哋一有罰球同角球即有胡叫。侯斯迪離隊亦令球隊中前場推進更快速，新箭頭祖斯盧辛馬田喺前線頻於走動，熱身賽同德國盃表現都惹人好感。
史浩克有兩個計時炸彈

史浩克今夏並冇針對孱弱防線引援，兩個防線計時炸彈祖爾麥迪比同菲臘比辛坦拿，無論位置感同穩定性都無法予人信心，搞到隊長賀維迪斯成日要同佢哋執漏，但賀維迪斯踢完世盃決賽周遲歸隊，狀態未足，偏偏兩個計時炸彈攔截時動作誇張容易被吹罰，更有利漢諾威攞罰球。史浩克喺德國盃畀丙組仔特雷斯登踢出局，目前狀態未到位，加上原本最有威力嘅右路雙雄內田篤人同法芬都因傷缺陣，令漢諾威左閘彭達可以更放膽助攻，主隊受讓博得過。