紅魔省招牌得米

猪拉多纳

個個等睇尹戈爾開齋！

英聯盃第2圈最大焦點，當然係「戰術大師」尹戈爾能唔能夠開齋贏波！米爾頓凱恩斯今晚喺主場對曼聯，唔值得冷敲，紅魔前晚喺英超作客被新特蘭逼和1:1後，新領隊尹戈爾已創出曼聯英超開季最差紀錄，勁過「天才1號」莫耶斯，當然要開1.9倍「讓球客勝」省招牌！

（TVB301及廣東體育周三凌晨3:00直播）

曼聯開季兩場聯賽對史雲斯同新特蘭，唔算太惡啃，誰不知最後兩戰得1分，創出自92/93年球季後紅魔英超最差開局。雖然過去曼聯曾經有3次頭兩場聯賽不勝，最後奪得英超冠軍嘅經驗，可惜新領隊尹戈爾自撥冷水，話今年紅魔要重奪英超錦標，要有奇迹出現至掂。
二線兵小豌豆 香川搏命避清洗

雖然尹戈爾補充話，以往執教拜仁慕尼黑都有創造過奇迹，不過佢應該心知肚明，要帶領曼聯拎聯賽冠軍唔容易，而且紅魔今年冇得踢歐洲賽，佢當然要攬實聯賽盃同足總盃啦！更何況呢場再唔贏，全球曼迷實恥笑佢係「天才2號」，咁冇面嘅事佢老人家實唔肯制。

唔只咁呀，今場紅魔預計會派副選陣容出戰，射手查維亞靴南迪斯、中場香川真司同後衞基斯史摩寧都要爭取表現，假如佢哋唔想被清洗或者坐冷板，今場肯定搏晒命，誇張啲講，真係生死存亡時刻呀，事關曼聯開季走勢咁曳，佢哋短期內都好難喺聯賽出現。
米爾頓凱恩斯英甲捱世界

米爾頓凱恩斯喺08年以英乙冠軍身份升班後，一直喺英甲捱世界。佢哋每逢有射手打起，就會好快被人搶走，好似賴恩路維同班福特，効力冇耐已經走人。而且對上兩季米爾頓凱恩斯喺英聯盃遇到新特蘭，至少淨輸2球出局，呢鋪對住級數高得多嘅曼聯，睇怕都好難偷雞。
Data King：米爾頓凱恩斯連開4口「半細」

‧米爾頓凱恩斯連續4場開半場入球細。

‧曼聯上季盃賽作客得2勝2和3負。

‧曼聯連續2場聯賽開角球細。
乜都玩錦囊：尹戈爾搶W博半勝

米爾頓凱恩斯已經連續3場半場冇波入，反映出佢哋踢法都幾慢熱，鍾意上半場歎慢板。另一方面，曼聯開季連續兩場聯賽不勝，新領隊尹戈爾個心肯定急住開齋，當然會吩咐球員盡快打開紀錄啦！假如大家嫌紅魔「讓球客勝」太冒險，都可以揀曼聯1.75倍半場勝。
盤路解碼

曼聯上季作客「讓球主客和」

12勝4和10負