尹帥企硬3後衞 陣痛難免

猪拉多纳

曼市雙雄命運逆轉，唔係講假，近年曼城往往得利，相反曼聯自從費爵爺退休後未好過，上季成績差強人意，今季搵來名帥尹戈爾諗住會大反彈，點知繼續一沉不起。

呢位荷蘭教頭鍾意踢3後衞戰術，但佢麾下眾將太習慣4人防線，因為3後衞的確非常難踢，一來防中要不時往兩邊補位堵塞漏洞，兩名翼衞更係關鍵所在，唔單止上上落落要好機動性，由於成條邊路由佢哋打晒，無論體能定攻守能力都要求極高，難怪搞到尹帥頭都痕埋。

雖然曼聯今晚聯賽只係作客排19嘅般尼，似乎係開齋良機，不過般尼乃正宗爛頭卒，主場出擊必定搏甩髀，就算紅魔牌面勁有名氣，但踢波嘅嘢冇話贏梗。況且尹戈爾仲未執掂班波，Peter呼籲一眾魔粉要畀多啲耐性，畢竟新人事新作風，新領隊、新球員、新戰術都需要時間適應，季初出現陣痛絕不出奇。假如曼聯再過一輪都未有起色，尹戈爾會執意3後衞陣式？還是審時度勢變陣止跌呢？大家拭目以待。
金句：紅魔今時唔同往日