喜鵲飢渴怒爆水晶宮

猪拉多纳

歐霸盃近年被唔少強隊視為雞肋賽事，不過估唔到前晚附加賽次回合，幾支名牌隊伍好似國際米蘭、慕遜加柏、熱刺都大勝而回，實在令唔少莊家始料不及，不過歐霸盃喺獎金收入方面始終同歐聯有差距，所以現階段唔可以對各支球隊嘅爭標決心咁快下判斷，遲吓展開嘅分組賽隨時會有另一番局面。

莊家開盤除咗睇實力之外，仲要不時收吓球隊內部消息，今季英超未開咧，水晶宮就同領隊佩尼斯因增兵鬧分歧而解約，臨陣冇帥都咪話唔傷。上季正係佩尼斯中途上任，將瀕臨降班邊緣嘅水晶宮提早護級成功，絕對係有料之人，佢走咗難怪開季兩仗全部輸晒喇。
臨急換帥有排執

搞咗一大輪，水晶宮喺周中終於搵到禾諾克回巢接手，呢位65歲老帥綽號係升班專家，曾經帶領錫菲聯及昆士柏流浪衝上英超，但佢始終唔係納比、哥迪奧拿、莫連奴等大師級名帥，仍傾向高Q大棍嘅老式打法，證明佢只適合喺水平較低嘅聯賽執教，來到水準高幾條街嘅英超，明顯力不從心，短時間內要執得掂軍心不穩嘅水晶宮，難度極大。

今晚水晶宮作客紐卡素，「喜鵲」開季兩仗聯賽雖然未嘗一勝，但如果有睇佢哋上仗作客阿士東維拉反客為主嘅表現，睇得出球員充滿對勝利嘅飢渴感，其中法國新援雷米卡比拿表現堅搶鏡，紐卡素讓到半一乃信心保證，捧上盤較穩陣。

（now 625周六晚10時直播）