BETTING GUIDE：棄箭報仇拆車

猪拉多纳

(六)62 愛華頓 Vs 車路士

有仇不報非君子！車路士兩大棄鋒盧卡古、伊度奧齊齊聚首愛華頓，今場主場硬撼仇家車仔，適逢「藍戰士」鋒霸迪亞高哥斯達因傷缺陣，受讓平半嘅「拖肥糖」梗係有殺錯冇放過，吼下盤﹗

（now 621周日凌晨零時30分直播）

係人都知「寸王」莫連奴仇家多，「拖肥黑雙煞」盧卡古同伊度奧都先後同佢結下仇怨，「新魔獸」盧卡古喺車仔苦無上陣機會，加盟愛華頓即畀莫帥寸爆話佢爛泥扶唔上壁，明明盧卡古近年已經證明咗自己夠料喺英超立足，依家咁樣畀人抽水，「新魔獸」仲唔爆車畀你睇？而伊度奧上季就畀莫帥笑佢係「伊度Old」，二人關係因而交惡，一加盟愛華頓處子戰就係對車仔，今場實會落力證明自己「寶刀未老」﹗
迪哥缺陣 冇人識入波

車仔今場除咗面對兩大棄將外，最大鑊係前鋒迪亞高哥斯達喺操練中拉傷腿部肌肉，有可能要抖成6個星期，冇咗呢位入球泉源，「藍戰士」無論用「廢托」費蘭度托利斯定「老魔獸」杜奧巴都係凶多吉少。
(六)5 鹿島鹿角 Vs FC東京

鹿島鹿角雖然四連勝弗爆，走出早排連場不勝嘅低谷，但今晚主場迎戰FC東京，唔單止有隊長小笠原滿男停賽，連中場遠藤康及後衞植田直通都要坐波監，尤其係冇咗小笠原滿男對進攻組織大受影響。FC東京防線一向穩陣，早前試過連續六場冇失波，上仗對紅鑽突然發波瘟失4粒，相信今仗唔會再大意，有得受讓梗係捧讓球客勝。

（有線64及203台周六晚6時直播）
(六)23 曼城 Vs 史篤城

祖維迪翻生，曼城有鑊氣！呢位黑山射手上仗英超梅開二度，助球隊擊敗利物浦，證明自己非水貨，由於曼城受「公平財政政策」限制，今季未能再以本傷人大事增兵，祖維迪及時彈起，等同球隊獲猛將「加盟」。雖然阿根廷前鋒阿古路喺操練時受傷有機會缺陣，但曼城仲有極希望入波嘅迪斯高，試問史篤城點抵擋？曼城近6次聯賽主場對史篤城，獲得全勝兼冇失波，其中4次淨嬴3球，曼城讓兩球照直取讓球主勝。 （now 621周六晚10時直播）
(六)26 史雲斯 Vs 西布朗

史雲斯自首輪爆冷擊敗曼聯後愈踢愈順，連周中英聯盃擊敗史洛達咸，開季已經三連勝，南韓國腳奇誠庸周中和球會續約，能專心替球會賣命。西布朗今季表現亦唔錯，頭兩輪聯賽先後打和新特蘭及修咸頓，但佢哋周中英聯盃和牛津聯激戰咗120分鐘，最終始憑互射12碼晉級，體力上較輸蝕。史雲斯今季三次贏波都係贏一粒，除捧主W外，讓球和亦不妨小敲。

（now 624周六晚10時直播）
(六)30 富咸 Vs 卡迪夫城

今季齊齊降班到英冠嘅「難兄難弟」富咸同卡迪夫城將喺富咸卡雲農舍球場對戰，兩隊都為重上英超而大灑金錢招兵買馬，「卡城」開季踢咗4場得2勝1和1負，成績尚可，不過富咸竟然4戰全敗排包尾，認真係衰到貼地，主帥馬加夫已經聞到魷魚香，今場都係捧對家「卡城」為妙，吼客勝﹗

（TVB 301周六晚10時直播）
(六)59 基爾禾 Vs 祖雲達斯

意甲今晚開鑼，揭開戰由上季冠軍祖雲達斯作客基爾禾，雖然祖記冠軍主帥干地離隊，但球隊仍保留大部分主力，而且新教練阿里基3年前曾經率領AC米蘭奪得意甲冠軍，屬於有料之人，近期熱身賽表現亦對辦，相信可延續皇朝，今場遇弱捧讓球客勝。

（TVB 301周日凌晨零時直播）
(六)65 畢爾包 Vs 利雲特

「巴斯克雄獅」畢爾包喺周中歐聯附加賽反勝拿玻里3比1躋身分組賽，贏得精采但眾將消耗唔少體力，話咁快今晚喺西甲主場火併「豬頭骨」利雲特，匆匆再戰未必回得切氣。利雲特自知技不如人，今仗仲有中場魯賓加西亞及謝美加維蘭缺陣，作客必死守頂住「巴斯克雄獅」，預期畢爾包會踢得好辛苦，不妨博佢哋贏一粒、有3.5倍分頭嘅讓球和。

（now 632周日凌晨1時直播）
(六)77 羅馬 Vs 費倫天拿

意甲首輪即上演大戰，羅馬主場對費倫天拿，上季亞軍羅馬中堅貝拿迪亞剛轉投拜仁慕尼黑，防線頓失重心，未必好似上季咁穩陣，慶幸托迪等進攻球員近況夠弗，入波唔成問題。費倫天拿射手馬里奧高美斯已擺脫傷患困擾，早前熱身賽更頂破皇馬大門，啱啱仲獲國家隊重召，兩軍火力猛，捧入球大啱數。

（TVB 301周日凌晨2時45分直播）
(六)79 馬德里體育會 Vs 伊巴

馬德里體育會今季冇咗射手迪亞高哥斯達，火力大減，首仗僅同華歷簡奴互交白卷，最大鑊係教練施蒙尼今場繼續停賽，冇佢喺場邊指揮同振奮軍心，球員失晒方向。西甲「神奇球隊」伊巴升班後首仗爆冷贏波，士氣高昂，憑拚勁同對手周旋到底。馬體會即使有主場之利，但要咬入伊巴亦唔易，似開細格局。

（now 632、TVB 13周日凌晨3時直播）