天使入魔秒殺般尼

猪拉多纳

拯救曼聯！「金7」再現！

曼聯「金7招牌」重出江湖！「魔躉」諗住新季有「戰術大師」尹戈爾掌帥印，點都唔會衰得過「天才」莫耶斯啦，點不知開咧踢2場聯賽只拎得1分，聯賽盃仲要吞英甲仔米爾頓凱恩斯4蛋出局，認真離譜！正所謂知恥近乎勇，曼聯今晚造訪般尼仲有埋「天使」打救，迪馬利亞會披起曼聯傳奇7號戰衣搏殺，好，小妹決定信多佢哋一次，撐1.95倍「半場客勝」！

「英超曼聯又輸一場」呢句嚟自電視新聞主播嘅對白，上季已經成為經典，勢唔估到，今季出現嘅比率仲多過上季、點搞呀！講真，尹戈爾真係令萬千「紅魔迷」失望，好多粉絲已經失去耐性，準備搞集體運動，畀壓力曼聯高層，炒尹帥魷魚！
巨星效應谷起隊友信心

愛之深責之切大家都明嘅，不過各位球迷有眼見，「魔頭」尹戈爾喺世盃帶荷蘭真係帶到有聲有色，功力唔使懷疑，小妹覺得大家應該畀多啲時間佢，話晒依家只係季初，單憑3場波就判佢死刑，真係太苛刻喇！

最重要嘅，係尹戈爾欽點嘅「天使」迪馬利亞已經來投，今晚極有機會落場搏殺，一眾「魔躉」等到頸都長，終於等到繼佐治貝斯、白賴仁笠臣、簡東拿、碧咸及C朗後，真正7號戰衣嘅繼承人，喺球場上面飛馳！「天使入魔」帶嚟嘅「巨星效應」，肯定畀到信心班隊友，一眾紅魔依家求表現心切，今戰肯定一開波就喪攻，希望快刀斬亂麻騷Quali！
般尼3連敗擺明未夠班

般尼曾經喺09年升上英超，仲喺首仗主場賽事以1:0爆冷擊敗曼聯添！不過最後隊波都係要做「升降機」降番班，浮浮沉沉，闊別4年後終回歸英超，佢哋喺季前熱身戰績都唔算曳，之不過一埋牙就見真章，開咧後先被車路士反勝，之後聯賽、盃賽又輸畀史雲斯同錫周三，實力明顯未夠班，一開波未站穩陣腳，分分鐘半場已大比數落後啦！
Data King：曼聯對賽例淨勝般尼

‧雙方近10次對賽，曼聯取得7勝2和1負。

‧計埋熱身賽，曼聯近9戰開出7口入球大。

‧曼聯近5次擊敗般尼，全部都要對手吞蛋。
乜都玩錦囊：紅魔喪攻「大」無畏

曼聯獲迪馬利亞強勢加盟，今晚佢夥拍朗尼同尹佩斯兩大數胡球星，入波肯定易過食生菜。不過「紅魔」新帥尹戈爾堅持踢3後衞陣式，開季至今場場有失波，英聯盃更被米爾頓凱恩斯連環劏穿防線，預計今晚主場出戰嘅般尼都會偷到一、兩粒。既然兩邊都有鋒力，1.82倍「入球大」梗係抵玩啦！
盤路解碼

曼聯上季聯賽13次「-1讓客」，有7次成功開出。