辛尼特正宗蠱惑「細」界仔

猪拉多纳

趕狗入窮巷未必着數，尤其好似莫斯科火車頭呢隊俄超惡棍，佢哋剛啱响歐霸盃出局，成班人畀Fans插到體無完膚，谷谷埋埋一肚氣，今晚主場對住班霸辛尼特肯定會死砌，建議大家咪買辛尼特呢支名牌，玩吓個1.7倍入球細算喇。

辛尼特俄超開季全勝，5場波入17球嚇死人，好難叫人咪碰客W，但細心啲從賠率去睇，辛尼特走勢咁勁都有1.87倍回報，絕對係筍過龍，連辛尼特主帥保亞斯都話今場係五五波，火車頭响歐霸盃主場畀阿波羅利馬素呢支塞浦路斯球隊炒咗鋪4:1，全隊面目無光，主帥古哥可能下台，今場為名譽而戰，呢啲波仲惡踢。

最重要係，辛尼特簽咗查維加西亞返嚟，因為財政公平條例暫時唔用得，必須响呢兩日減磅，將部分球員清走平衡開支，尋日後衞侯保根就被送咗去莫斯科戴拿模，家陣班球員人人自危，跌Watt好正常，贏唔到唔出奇，贏到亦唔見得會係大炒。
（日）30 莫斯科火車頭 Vs 辛尼特