4星德國霸氣搶W

猪拉多纳

世盃決賽翻版 阿根廷復仇無望

國際熱身賽檔期由翻版世界盃決賽響頭炮，由首次穿上4星戰衣嘅德國主場迎戰阿根廷，兩隊相隔一個半月再次交鋒，形勢各走極端。德國兩大射手馬高列奧斯及馬里奧高美斯重返大軍，火力比捧世盃時更加強大。反觀阿根廷更換領隊，由前巴塞「庸帥」馬天奴執教，睇到都唔開胃，加埋球王美斯倦勤，令雙方實力差距進一步拉遠，簡單捧1.7倍主W。

（無綫翡翠台周四凌晨2時45分直播）
馬高列奧斯 傷愈回歸

德國以無敵姿態奪得世界盃冠軍，極具說服力，雖然隊長拿姆、高路斯退隊，舒韋恩史迪加受傷缺陣，但最重要係勒夫繼續領軍。佢今次除咗保留湯馬士梅拿、基迪拉、馬里奧葛斯等捧盃人腳外，仲重召馬高列奧斯同馬里奧高美斯。前者堪稱德國當今最強進攻球員，可惜因傷無緣世盃，白白錯失攞獎牌機會，的確好唔抵，巧合遇上阿根廷，勢必當決賽咁踢，搵番嘅心靈慰藉。

至於在最後選拔被剔出世盃名單嘅箭頭馬里奧高美斯難得重返國家隊，更加要好好珍惜機會，爭取重獲勒夫信任，佢嘅制空力令德國進攻更加多元化。日耳曼兵團踢熱身賽一向都認真，尤其係面對「宿敵」阿根廷更加唔衰得，證明自己捧世盃絕對實至名歸。
馬天奴冇料 美斯缺陣

率領阿根廷打入世盃決賽嘅沙貝拉已離任，並搵來馬天奴執教，難免令人失望。呢位51歲主帥上季執教巴塞隆拿，擁有美斯和尼馬等大批球星，但卻落得四大皆空收場，一季就被炒，有幾多料可想而知，更何況馬天奴剛接手，仍需要時間重建球隊，最大鑊係美斯缺陣，馬天奴霎時間好難諗到破敵良方事實上，阿根廷喺世盃表現並非特別出色，決賽即使有「半個主場之利」加時輸畀德國，今次作客相信好難報到仇，德國主W值得捧場。