英格蘭細難發獅威

猪拉多纳

鶴臣冇料 新隊長朗尼冇計

隨住英格蘭「雙特」中場謝拉特同林柏特雙雙退出國家隊，「三獅兵團」正式踏入新時代，由新隊長朗尼帶領一班「幼獅」征戰沙場，喺2016年歐國盃外圍賽正式開打之前，先嚟一場熱身賽；英軍將於溫布萊球場迎戰挪威，睇牌面當然以英軍秤先，不過科娜經常都強調，英軍一日由庸帥鶴臣執教，就永無翻身之日，英格蘭攻力依然好弱雞，捧細盤同半場和仲啱數。

（now 621周四凌晨3時直播）

冇咗「雙特」，英格蘭大軍進一步年輕化，中前場以新隊長朗尼為首，拍住利物浦三子史杜列治、史達寧同佐敦軒達臣，另外領隊鶴臣今次更挑選咗哥林張伯斯、丹尼路斯、哥爾碧克同戴爾夫等國家隊新丁，明顯想令球隊更有活力。
控傳踢法難破挪威

不過無論呢班球星喺球會表現有幾好，為國家隊上陣發揮總係唔多理想，實力大減一半以上，點解？個答案咪就係鶴臣囉，呢位老帥見到利物浦嘅控傳踢法咁成功，就諗都唔諗將呢個踢法移植到「三獅兵團」身上，但喺剛過去嘅世盃已經證明做Copycat係唔work嘅，英軍球員根本唔適應呢種踢法，結果踢到四不像咁。見到三獅兵踢得唔對路，鶴臣就竟然唔識點變，咁搞法英軍點捧得落吖。

唔好以為朗尼今仗首任三獅隊長就必定大爆發，首先佢近期嘅狀態唔算好，如果唔係曼聯都唔會踢咗三場聯賽都未開齋啦！其次就係鶴臣由始至終都解決唔到朗尼喺場上定位嘅問題，同史杜列治喺前鋒線拍住上？唔掂。將朗尼擺喺翼位或者進攻中場？結果都係唔掂！

挪威今次有多位喺德甲搵食嘅球員助陣，包括哈化柏林門將查斯甸、慕遜加柏中堅洛特維迪等，科娜相信佢哋今場目標都係不敗，因為挪威之後會喺歐國盃外圍賽硬撼意大利，若然今仗畀英軍大炒實會影響士氣，所以挪威今場會死守，和波都收貨，入球細同半場和都可以兼顧。