意大利荷蘭領隊大鬥法

猪拉多纳

世盃過後，多支列強換上新帥重新出發，包括今晚將會對戰嘅意大利同荷蘭，「藍衣軍團」搵嚟祖雲達斯冠軍教頭干地執教，而「橙衣軍團」就有「神奇教練」希丁克再度出任主帥一職，兩位領隊都想喺領軍首戰打響頭炮，今場博大盤！

（周五凌晨2時45分開賽）

連埋今夏嘅巴西世盃，意大利連續兩屆世盃喺分組賽出局，今場係主帥干地首次領軍面對荷蘭，佢講到明要復興意大利，更話喺世界上，意軍係僅次於巴西嘅足球國家，雖然係大口氣咗啲，不過都證明咗干地嘅決心。
飛起腦殘無損攻力

意大利今次點兵最大變動就係前鋒線，首席中鋒「腦殘」巴洛迪利竟然落選，反而艾沙拉維、迪斯度、基奧雲高呢幾個冇份踢世盃嘅前鋒入選，仲有薩斯索羅前鋒施蒙尼沙薩首度入選國家隊，唔好以為佢哋實力冇咁強，攻力就會削弱，因為呢班「意國邊緣人」實會把握今次黃金機會，落力爭取表現。另外中場雖然有「派牌專家」派路因傷落選，不過就令成條中場線活力大增，行軍更快。

荷蘭新帥希丁克一向崇尚進攻足球，作客意軍都會照攻，雖然球隊有洛賓、雲達華治同亨特拉爾呢三大進攻主將因傷病未有入伍，好彩隊長尹佩斯同中場大腦史奈達仍在陣中，其實「橙衣軍團」最大隱憂係中堅華亞爾因傷缺陣，冇咗呢位後防中流砥柱頂住，荷蘭要靠迪維積同馬田斯恩迪呢兩位年輕中堅，防線或冇世盃嗰陣咁穩陣，捧大盤啱數！