國足冇默契唔慌多攻細

猪拉多纳

中國今晚喺遼寧省鞍山市主場對科威特踢熱身賽，雖然主帥佩蘭講明要贏波，希望可以喺世盃外圍賽抽籤得到更有利位置，但科威特領隊祖雲韋亞拉自爆已經約滿，為咗搵新工，相信佢唔會想喺呢個時候帶隊慘敗，不如博科威特玩死守開1.5倍入球細。

（中央5台周四晚7:35直播）

國足緊接對科威特同約旦，主帥佩蘭講到贏硬咁，話要儲分提升世界排名，希望喺世盃外圍賽抽籤嘅時候，得到更有利位置。不過，佩蘭上任後幾乎乜人都揀吓，搞到班波更加冇默契，雖然後衞榮昊因傷退隊，右閘張琳芃又要陪老婆生仔請假對國足攻擊力冇咩影響，但唔好忘記，之前佩蘭領軍兩次對馬其頓，都係開入球細咋！
科威特領隊搵新工唔衰得

另一方面，科威特領隊祖雲韋亞拉話自己已約滿，今次只係捱義氣帶隊，仲話可能帶埋今場就正式劈炮，聽落都幾匪夷所思。正因為咁，我覺得祖雲韋亞拉會嗌科威特班球員踢得好好睇睇，唔係點搵新工呀？冇錯蒙彼利埃中場馬沙安未歸隊，但科威特仲有艾卡迪斯亞射手艾穆華孭飛，國足未必敢亂攻，不如試吓玩細。
巴西盃、南美球會盃賽制

採主客兩回合制，巴西盃為16強次回合；南球盃（四）10為第2圈首回合，（四）8、11為第2圈次回合。以上賽事兩回合計打和，計算作客入球優惠，未分勝負將於次回合法定時間後以互射12碼決勝。