德國玩細抵過W

猪拉多纳

世盃後遺症 剃「蘇」刀仲未磨番利

歐國盃外圍賽今晚全面開火，D組德國喺多蒙特嘅西法倫主場迎戰蘇格蘭，兩軍牌面差幾班，德國旗開得勝料無懸念，不過呢支世盃冠軍目前正處於調整期，不但陣容不整且狀態欠佳，面對進步中嘅「硬骨頭」蘇格蘭，雖然贏面仍高，但唔會贏得好多，主W太熱冇肉食唔玩也罷，反而大細中位數因調整到3.5球，細盤更加值捧。

（有線61及201台周一凌晨2時45分直播）
三大主力退役 調整需時

德國捧完世界盃進入調整期，拿姆、高路斯同梅迪薩卡退役，曉姆斯、舒姆沙、奧斯爾、基迪拉、達斯拿同新隊長舒韋恩史迪加全數因傷缺陣，陣容嚴重不整。上周中熱身賽以2比4不敵阿根廷，代替高路斯掛帥嘅馬里奧高美斯不斷敗家，畀自己球迷勁柴台，今晚領隊勒夫焗住用番無鋒陣。大敗過後，德軍會更有鬥志更集中，但一眾世盃腳經過熱烈慶祝後需要較長時間調整，目前大部分狀態都未十足，戰鬥力同喺巴西捧盃嗰陣差好遠。

蘇格蘭沉寂多年，踢法悶蛋，弱旅形象深入民心，不過呢班波自去年初由史特根接手後，正默默起革命，球隊自去年今日世盃外圍賽不敵比利時後，保持咗足足一年不敗，6場比賽4勝2和，當中有4場保持不失，世盃外圍賽兩勝克羅地亞見證進步明顯。
對賽往績 蘇格蘭唔失禮

雖然明知今仗作客凶多吉少，但賽前誓師大會十分隆重，因為今屆決賽周隊數增至24隊，除首次名出線外，小組第3都有機會，加上籤運不錯，同組除德國大超班外，其餘波蘭、愛爾蘭、格魯吉亞同直布羅陀都唔係勁旅，史特根話蘇格蘭上次打入大賽決賽周喺98世盃，主辦國係法國，咁啱今屆2016歐國盃亦喺法國舉行，令佢哋對重返大賽決賽周更添雄心。

史特根點兵基本上以英超同英冠球員為骨幹，今仗些路迪中場大腦史葛布朗因傷缺陣，更加冇嘢諗要專心防守，正選陣容有7個英超兵同4個英冠兵，個人質素當然遠遜德軍，但硬淨踢法打德國一向有辦法，兩軍史上15次交鋒，德軍只贏6場，93年至今雙方4度對壘最多只係一球上落，總入球都係3球以下，今場追細盤好路。