匈牙利讓球勝愛得過

猪拉多纳

F組匈牙利主場鬥北愛爾蘭，匈牙利陣中雖然冇大牌球星，但佢哋近年喺外圍賽表現其實唔錯，乘住今屆決賽周席位增至24個，正係佢哋爭取自86年世界盃後再度打入大賽決賽周嘅絕佳時機，首戰主場面對弱旅北愛爾蘭，讓球主勝捧得過。

（有線61及201台周一凌晨零時直播）
北愛爾蘭冇星孭飛

匈牙利對上一次參加大賽決賽周係86世界盃，之後一直都衝唔出外圍賽，但睇番2014巴西世盃外圍賽，佢哋喺歐洲區D組最終排名第3，只以1分落後第2位、取得附加賽資格嘅羅馬尼亞，而且當時主場外圍賽只係輸過畀超班嘅荷蘭，曾經3比1贏過土耳其及大炒愛沙尼亞5比1，攻力甚有保證。

匈牙利同組有希臘、羅馬尼亞、芬蘭、法羅群島及今仗對手北愛，從牌面睇冇邊支球隊鶴立雞群，基於頭兩名及9組中最佳成績第3名可直接出線，就算排第3亦有機會透過附加賽爭入決賽周，計實力匈牙利的確有好大有機會一搔30年之癢。北愛爾蘭嘅世界排名已跌至95，自大衞希利退役已經冇乜孭飛球星，今次連近年最有卡士嘅曼聯中堅莊尼伊雲斯都冇入選，相信作客將會難逃大敗一場。