兩獅相爭瑞士頂到英軍

猪拉多纳

歐國盃外圍賽烽煙四起，任何球隊都充滿希望，但講到嚟緊周二凌晨E組賽事瑞士主場對英格蘭，兩隊均並非爭標分子。前者猶如阿婆行路舂舂吓，英格蘭更加係雄風不再，自66年稱霸世盃後，四十幾年來不斷令擁躉搖頭嘆息，冇優質領隊及球員帶領下，佢哋嘅歐國盃爭標前景，剩番渺茫同冇機會。因為要爭標要有兩大先決條件，就係一名運籌帷幄嘅有料教頭，以及一批具分量嘅球員冒起。
英格蘭作客先求穩陣

睇番2010年世盃，德國湧現出大批如奧斯爾、紐亞、湯馬士梅拿等希望之星，並且喺該屆賽事嶄露頭角，經過四年洗禮之後，佢哋逐漸成熟，最終喺今夏嘅巴西世盃奪標而回。觀乎依家嘅英格蘭兩大條件都欠奉，毫無冠軍相可言，而「白十字之獅」瑞士只屬中庸分子，加上今場係第一仗兼作客，「三獅兵團」只求穩穩陣陣，睇嚟和波機會高唱入雲。至於今晚亦有一場和味濃賽事，就係F組希臘主場硬撼羅馬尼亞，雖然希臘世界排名較高，但呢兩隊都係有份參加冇盃捧之流，不妨嚟個和波過關2串3，又或者1比1加0比0嘅波膽過關2串3，都咪話唔和味呀。
金句：中庸白十字之獅，初逢厚望不寄的三獅兵團