希臘盤口硬淨打羅

猪拉多纳

趁住依家歐國盃外圍賽揭開戰幔，肥叔就同大家研究吓國際賽。畢竟各大球會先係球員嘅米飯班主，嚟到國際賽期，特別係啲無關痛癢嘅熱身賽，球員難免避重就輕，好似上周中英格蘭搵咗挪威「拍跳」，「三獅兵團」衰衰哋都派出朗尼、史杜列治、韋舒亞等主力，讓到球半唔算過分，賽前好多散戶都入咗上盤，點知班波踢落慢吞吞唔多對辦。半場休息嗰陣，入球大細中位數調至1.5球，一眾散戶見勢色唔對，決定轉玩大盤，但「三獅兵團」毫無起色，最終靠球12碼贏1比0，不但贏波輸盤，連大盤都瓜埋，再一次證明名牌球隊踢熱身賽，讓得太辣避得就避。

講番歐國外，今晚有場希臘主場迎戰羅馬尼亞，後者沉淪多時已今非昔比，希臘話晒喺世盃歷史性殺入16強，盤口方面佢哋小讓平半兼低水，咁硬淨似乎贏得，不妨揀上盤。至於應屆世盃盟主德國，上仗熱身賽對阿根廷失四粒認真失威，防線表現錯漏百出，雖然今夜只係對住平平無奇嘅蘇格蘭，但讓到兩球半略嫌過火，個人認為轉玩大盤最好路。