水手傷兵滿營 難攞着素

猪拉多纳

橫濱水手响日聯盃8強首回合主場輸波，今日次回合作客柏雷素爾仲傷兵滿營，居然都冇得受讓似係陷阱，呢場波便宜莫貪，平手博1.7倍柏雷素爾。

（開賽時間：周日晚6:00）
柏雷素爾射手示威

從形勢上嚟講，水手首回合主場輸咗1:2，今場贏1:0都唔掂，必須淨勝兩球至入到4強，佢哋有冇條件翻身呢？由往績去睇，佢哋頂龍得5成機會，事關水手以往17次作客對賽只得6勝4和7負，毫無優勢可言，最令人頭痛嘅係，水手除咗射手齊藤學養傷，中村俊輔、兵藤慎剛同中町公祐响上場波都傷埋，其中中町仲係腓骨骨折，一條中場線少咗3件，後衞栗原勇藏仲坐波監，有乜本錢玩逆轉吖！

柏雷素爾就咁啱調轉，唔單止盃賽、聯賽兩連勝，近8場波保持不敗，畀日本國家隊棄用嘅前鋒工藤壯人，仲因為谷埋成肚氣，要向「藍武士」新任主帥艾古爾示威，近兩場波踢得特別生猛，場場有波入，加埋主場嘅天時地利，按道理水手未必頂得佢住。

但係足智彩今場初盤由個主客和到讓球盤，都唔似睇好柏雷素爾，不過查翻以前嘅平均賠率紀錄，兩隊交鋒柏巿個主勝水位同客勝相差唔遠嘅話，主勝開咗3次，只係試過1次和波，咁嘅賠率格局都係博跌緊水嘅主隊好啲。
首回合：柏客勝1:2

日聯盃賽制：今輪為8強次回合賽事，採取兩回合主客制。若總比數打和，先計算作客入球優惠，再和在次回合90分鐘後加時30分鐘，再和則互射12碼分勝負。