意軍冇星 好難攞威

猪拉多纳

新帥干地懶醒 唔揀巴神派路

尋日先講完英格蘭重組有漫漫長路要走，今晚歐國盃外圍賽首輪最後一晚，H組嘅意大利一樣面對改革期嘅陣痛。「藍衫軍」喺世盃後換帥，由前祖雲達斯教頭干地擔任新領隊，勢估唔到佢一上任，巴洛迪利同派路就齊齊落選！小弟對佢呢個決定有啲保留，認為今場對住硬淨嘅挪威未必贏得到，挪威受讓半一，捧下盤好過！

（有線64、203周三凌晨2:45直播）

干地教祖雲達斯成績威威，不過帶國家隊就只係「新丁」一名，上任後第一次點兵已經引起唔少爭議，最大單就梗係唔選巴洛迪利啦！雖然「巴神」紀律係好有問題，不過干地就話今次唔揀佢，並唔係罰佢喺世盃期間違反球隊軍紀喎！如果干地真係信另一位麻煩前鋒奧斯華度多啲，咁就真係無話可說囉！
選高齡加利亞雷拉 抓爆頭

另一爭議就係中場老將派路，呢位「大師級」防中已經表明打消退出國家隊念頭，但干地都冇預佢，玩嘢咩！如果話想隊波年輕化，咁點解又重召已經4年冇入過國家隊、31歲「高齡」嘅加利亞雷拉呢？當紮射手恩莫比尼無疑係有潛質，但呢位仁兄今季過檔多蒙特後，開季表現明顯未操起，意大利嘅火力未必靠得住。
挪威踢法硬淨唔易啃

主場出擊嘅挪威向來注重防守，實力雖然唔係世界級，但硬淨踢法往往令唔少勁旅頭痛。上周中熱身賽作客英格蘭就有唔錯表現，大部分時間令「三獅兵團」老鼠拉龜，最後只係輸1球12碼。如無意外，挪威今場都會繼續咁踢，加埋喺主場球迷打氣，搶分成功唔奇o架！
挪威8戰半場不勝

意大利過往13次鬥挪威，取得6勝4和3負。

挪威近8仗未試過半場領先，僅得4和4負。

雙方近6次對碰，作客一方未贏過，成績為2和4負。
盤路解碼

意大利作客勁旺「入球雙」，近10場開出9次。

頂占筍盤：挪威（下盤）