厄瓜多爾唔齊腳 巴西發威追多鋪

猪拉多纳

巴西聽朝喺熱身賽對厄瓜多爾，可以試下玩2.07倍「讓主」。雖然巴西喺鄧加回歸做教頭後，日前只係以1:0砌低哥倫比亞，但大家咪忘記，厄瓜多爾根本唔齊腳，博新隊長尼馬繼續發威好過。

（開賽時間：周三早上9:00）

比賽喺美國新澤西舉行，相比起世盃得殿軍嘅陣容，今次巴西有唔少主力避戰，除咗射手費特同門將施薩索拉斯退出國家隊，前鋒侯克、中堅堤亞高施華同右閘丹尼爾都冇歸隊，但正因為咁，有份入選嘅球員肯定要踢得更肉緊，何況右閘馬爾干仲因為夜蒲事件被逐出隊，邊個夠膽唔聽話呀？
新隊長尼馬踩行油

事實上，尼馬以22歲成為巴西國家隊史上最年輕隊長後，上場對哥倫比亞喺比賽尾段射入靚波奠勝，既然作為必然正選嘅尼馬都踩行油博表現，其他巴西球員有咩理由唔搏先？另一方面，厄瓜多爾日前喺熱身賽以4:0大勝玻利維亞，問題係佢哋嘅射手卡些度同翼鋒路爾斯華倫西亞冇歸隊，前鋒費度馬天尼斯上場又傷埋，好易出事喎！