超霸鷹超幾班 「 讓客」捧得過

猪拉多纳

尼日利亞貴為上屆非洲國家盃冠軍，竟然喺今屆外圍賽A組首仗倒灶不敵剛果，今晚次輪作客對住南非，可以話係不容再失。睇番數據，「超霸鷹」對住南非已經有成10年冇輸過，雖然頭場輸得肉酸，但係雙方實力始終有一定差距，受讓1.44倍嘅「讓客」絕對捧得過！

（開賽時間：周四凌晨2:00）
尼日利亞近10年鬥南非不敗

「超霸鷹」上場意外以2:3輸畀實力一般嘅剛果，33年嚟首次喺主場輸波，仲要先入一球之下反輸3球，輸得相當肉酸，連埋世界盃最後兩場波，佢哋已經連輸3場。今仗佢哋繼續因為正選門將安耶馬退隊，要用伊積迪把關。尼日利亞今次選入唔少年輕球員，就連奧丹維治等老將都冇份踢，畀多啲年輕球員上陣，話唔定有新火花出現。而喺世盃表現出色嘅快翼阿密特穆沙就繼續擔大旗，相信今場都係靠佢為前鋒創造機會。

至於尼軍今戰對手南非，喺首仗作客頭威頭勢以3:0輕取蘇丹。不過，蘇丹嘅實力完全唔係「超霸鷹」嘅級數。今次外圍賽以國內球員為主力嘅南非踢大賽經驗唔多，而對上一次贏尼日利亞已經係2004年嘅事，仲要只係踢熱身賽贏波。實力唔算強嘅南非，想喺呢場破10年不勝「魔咒」，絕對有難度。