利華夠料秒殺不來梅

猪拉多纳

高速先生喜遇慢版王

國際賽後德甲回歸，周五獨腳戲利華古遜主場對雲達不來梅，兩軍新帥羅渣舒密特同杜特，係風格完全相反嘅主帥遭遇戰，一個要求極速，一個強調拖慢節奏，十分有趣。相比之下，利華質素遠在不來梅之上，主場出擊有力秒殺對手，黑柴推介讓球主勝同半全場「主主」。

（有線61及201台周六凌晨2時30分直播）

利華古遜今季換帥後大變身，開咧兩連勝雄踞榜首，新帥羅渣舒密特曾執教柏達邦同奧地利班霸薩爾斯堡，記得上季歇冬期，佢執教嘅薩爾斯堡同德甲班霸拜仁慕尼黑踢熱身賽，上半場已經轟入3球，最終打到拜仁全無還手之力，連拜仁主帥哥迪奧拿都話，薩爾斯堡速度之快係佢執教生涯前所未見。嚟到利華古遜，羅渣舒密特由操練開始就貫徹佢嘅理念，佢要求球員加強速度訓練，仲話只要球隊有11個百米飛人保特，就一定可以無往而不利。

利華古遜今季既換帥亦增兵，得到查漢奴古、祖斯比迪米斯、謝華積同柏柏杜普路斯加盟，加上外借回歸即帶來無限驚喜嘅比拿拉比，呢支咁有質素嘅球隊好快達到佢嘅要求，利華古遜嘅閃擊踢法多次令強敵措手不及，最經典係破紀錄嘅9秒入波秒殺勁旅多蒙特，令羅渣舒密特嘅「高速先生」外號已經深入民心。
平庸不來梅繼續下滑

雲達不來梅新帥杜特個性啱啱相反，出咗名係慢板王，不來梅過去喺舒哈夫帶領下崇尚進攻，球迷對呢位前主帥極為愛戴，當杜特上季領軍後，佢嘅沉悶踢法曾經令到球迷好唔開心，但結果喺佢帶領下，質素平庸嘅不來梅喺德甲保持10場不失球，仲攞到令人驚喜嘅第12名，令球迷無話可說。可惜，嚟到今季不來梅不但無應佢嘅要求增兵加強實力，仲放走埋球隊中場領袖肯特，實力進一步下滑，開季兩仗和到波但已見實力有限，如今經過國際賽空檔後，球隊仲要時間重新適應同融入，杜特嘅慢版踢法，作客面對羅渣舒密特嘅閃擊肯定蝕底。