馬體會IronMan打沉艦隊

猪拉多纳

新拍檔勁夾 打吡話晒事！

今晚西班牙馬德里市將會上演打吡大戰，由皇家馬德里主場迎戰馬德里體育會。皇馬今場有王牌C朗復出掛帥，不過佢哋條防線問題多多，好易畀馬體會「IronMan拍檔」文迪蘇傑同基沙文攻破，況且「床單軍團」自從改由施蒙尼執教後，每次對皇馬都不落下風，作客都有力頂住「銀河艦隊」，捧2.35倍「讓球客勝」！

（now632台周日凌晨2:00直播）

皇馬兩星期前作客狀態麻麻嘅皇蘇，早喺開賽後10分鐘就憑沙治奧拉莫斯同加里夫巴利入波，以2球領先對手，以為輕鬆大炒一場喇，點知最後竟然連失4球，呢場波反映出皇馬攻守失衡嘅問題，真係相當嚴重！特別係防中位置，沙比阿朗素轉投拜仁，基迪拉因傷倦勤，依家只係得番件級數未夠班嘅伊拿拉文迪頂住，防守效率自然減低啦！
C朗傷愈披甲 狀態成疑

係，雖然C朗經過連串治療後，經已喺周中復操，今晚趕得切披甲，不過始終係啱啱傷愈，狀態係點係一個疑問。皇馬所謂嘅救星，其實只係曼聯後備殺手查維亞靴南迪斯，就算「小豌豆」幾叻都好，要融入隊波都要一段時間啦！防守已經唔掂，家陣皇馬連鋒線都有個問號喺度，仲憑咩讓波讓得咁辣先？
兩個「文哥」 都有料到

大家咪以為馬體會季前放走迪亞高哥斯達，戰鬥力就會大跌，查實「床單軍團」年年都賣射手，但年年都咁勁，新季唔單止引入「拜仁神鋒」文迪蘇傑（Mandzukic），仲斟埋法國國腳基沙文（Griezmann）返嚟同佢拍住上添，兩位「文哥」射術一流唔在講，仲係嗰種鬼咁勤力滿場飛嘅球星添，從首兩戰可見，佢兩位仁兄堅有默契，一個帶波一個即時走位，當中文迪蘇傑上輪聯賽開咗齋，基沙文又不斷助攻，淨係呢條Iron「Man」鋒線，已經夠做啦！

仲有，「張峰」之前都講過，皇馬嘅防中咁多問題，反之馬體會中場就係全跑型，隊長基比、堤亞高文迪斯全部係又爛打又硬淨嘅掃蕩型中場，莫講話保持不敗，馬體會贏埋都仲得啦！
Data King：馬體會防線冠西甲

‧馬體會近8場西甲作客開出7口「半場細」。

‧皇馬近16次主場出戰西甲必有入波。

‧馬體會上季38戰僅失26球，防守力冠絕西甲。
盤路解碼：雙方近5次對壘，開出1單4雙。