尹戈爾再無失分藉口

猪拉多纳

隨住今夏轉會窗關閉，各隊買人賣人已經塵埃落定，當然有球隊臨急抱佛腳地頭痛醫頭、腳痛醫腳，於最後3日、甚至最後3個鐘頭急急入貨，希望彌補不足。不過，亦有很多基層穩固的球隊不會恐慌，只購入小量生力軍或替補，正如前列球隊車路士、曼城和阿仙奴，後者羅致阿歷斯山齊士係Good Buy，再買埋韋碧克亦可增強板櫈深度，因此Peter認為呢3隊奪標機會最高。
陣容鼎盛得誇張

車仔「寸王」主帥莫連奴上季罕有地認低威，結果真係冇獎盃落袋，但今夏買入迪亞高哥斯達同法比加斯等強援後，一開咧即順風順水，若果冇乜傷病，我堅信車仔係今季英超冠軍大熱。至於利物浦同曼聯亦有喺最後時刻掃貨，其中紅魔新帥尹戈爾愛用3後衞陣式，但好多英國球隊及球員都踢慣4人防線，尹帥啱啱接連買入迪馬利亞同馬高斯盧祖，仲借入哥倫比亞王牌箭頭法卡奧同荷蘭鐵衞戴利白蘭特，加上原有的尹佩斯、朗尼和桑馬達，陣容鼎盛得簡直有點恐怖，今晚主場迎戰昆士柏流浪，絕對係最佳試金石。

贏波自可增強球員信心，但萬一再失分就肯定有排煩，因為買如此投資竟搞到一鑊粥，對士氣打擊難以估計，尹帥如今手握一班自己親手買入的球員，已再冇失分藉口，主觀希望亦想紅魔能夠殺敗昆士柏流浪，打開今季聯賽勝利之門啦！
金句：基層穩固勝過頭痛醫頭、腳痛醫腳!