紅魔新兵未夾慣 QPR半和抵玩

猪拉多纳

曼聯喺季前熱身賽係威係勢，對住皇馬同羅馬等歐洲勁旅都可保持全勝，偏偏返到英超至今仲未打開勝利之門，上場就算有「天使」迪馬利亞登場，對住般尼都係贏唔到，證明球星都要時間融入隊波度。今晚主場迎戰昆士柏流浪即使有法卡奧、戴利白蘭特等新兵首演，睇怕入局需時，撐2.6倍半場和就最穩陣。

迪馬利亞以破曼聯轉會費紀錄加盟，可惜都做唔到救世主打救紅魔，雖然上場對般尼製造咗唔少威脅，但始終破門乏術。今場佢有望同喺轉會窗最後時刻加盟嘅「老虎」法卡奧、荷蘭國腳戴利白蘭特，以及終於搞掂工作證嘅馬高斯盧祖，同埋傷愈復出嘅勞基梳爾齊齊首演。嘩！咁多新兵一齊披甲，默契唔慌好啦！
曼聯中堅菲爾鍾斯抖3周

小妹喺曼聯開鑼戰對史雲斯時都有入場睇波，但完全感受唔到奧脫福嘅主場氣勢，而且佢哋開季至今未贏過，聯賽盃仲出埋局，據報連最穩陣嘅中堅菲爾鍾斯都受傷要抖3個星期，所以就算Yennie係曼聯躉，今晚都唔睇好佢哋囉！再睇番嗰3場聯賽，有2場都係半場同對手打成平手，連數據都撐半場和，點可以唔撐呀！
昆士柏 火力弱唔亂嚟

客隊昆士柏流浪開季至今3戰1勝2負，雖然成績認真曳，但起碼已經贏過波吖！不過佢哋3場夾埋先入得1球咁大把，攻擊力非常弱雞，何況夏利列納啱啱先上任領隊一職，睇怕都未咁快摸熟晒班球員，多數叫佢哋踢得穩陣啲。今晚佢哋作客曼聯，半場「和局」有成2.6倍，絕對值得一試。
盤路解碼：兩軍史上12次英超交鋒，開出4單8雙。

Data King：QPR英超浪射王

‧曼聯喺英超食住QPR，過往12次對壘取得10勝2和。

‧QPR堪稱今季「浪射王」，33次埋門入得1球。

‧QPR對上11次硬撼曼聯場場有失波。
乜都玩錦囊：紅魔半場熱身捧「和主」

曼聯大批新兵首演，默契唔夠，開波早段需時磨合，半場和固然值博，但兩軍戰鬥力始終有一段距離，喺「魔將」經過熱身後，要砌低昆士柏流浪可以話易過借火，一於揀埋夠晒分頭嘅3.55倍「和主」。