葉士域治頂得住韋根

猪拉多纳

今晚賽事戲碼較弱，但阿King依然搵到好嘢，其中英冠壓軸戰韋根主場對葉士域治最值得留意。前屆足總盃盟主韋根傷兵滿營，令近期演出極度飄忽，葉士域治作客小心翼翼唔會冒進，可靠穩健防守全身而退，有得受讓梗係揀讓球客勝啦！

（TVB 301周二凌晨2時45分直播）

韋根現於英冠淪落至第17位，與出現傷兵潮不無關係，除咗當年足總盃決賽一箭定江山嘅賓屈臣仲養緊傷之外，基斯麥肯及占士麥堅恩亦飽受傷患困擾，導致整體表現欠佳，睇番佢哋近8仗，只曾贏過明顯差一皮嘅伯明翰同黑池，其餘非和即輸，聯賽盃更遭低組別球隊伯頓踢出局，真係非常羞家。

據報占士麥堅恩已返回一隊，但啱啱好番未必能趕及今仗披甲。其實葉士域治亦唔係好貨色，又有中場甘馬倫史超活一傷再傷，不過主帥麥卡菲勝在有自知之明，開季踢咗8場正式比賽，佢哋只係失咗6粒，尤其係客場出擊特別保守，上仗作客更逼和劍指升班嘅打比郡，絕對有力與飄忽到暈嘅韋根周旋，讓球主客和葉軍受讓1球，讓球客勝乃是日過關重心。
紐維爾舊生坐和望贏

至於俄超有場阿馬卡主場火併卡斯洛達，阿馬卡經過季初頹勢後最近重回正軌，主力奧古迪更刑滿復出，相反卡斯洛達剛踢完歐霸體力未回復，今仗作客讓波信唔過。最後阿甲競賽會主場對紐維爾舊生，競賽會有前國米射手迪亞高米列圖及加比侯治缺陣，紐維爾舊生主力馬高卡沙利斯有望復出，挾住今季不敗身，平手盤坐和望贏。