落難紅軍醒米堡

猪拉多纳

腹背受敵 寧棄雞肋

英格蘭聯賽盃第3圈展開，近期頹勢同紅魔有得fight嘅「紅軍」利物浦，主場對英冠米杜士堡，利記今季冇咗蘇亞雷斯，唔止攻力唔掂，連防守都慌失失，球隊今季仲要分身歐聯，加上本周六英超「默西賽德郡打吡」對愛華頓，可謂腹背受敵。領隊羅渣士難免要作出取捨，使用輪換制，「雞肋」英聯盃最可能成為犧牲品。利物浦讓波，寧揀當勇嘅米杜士堡讓球客勝。

（TVB301周三凌晨2時45分直播）

利物浦開季至今跌跌碰碰，輸畀曼城，情有可原，但近兩輪聯賽不敵阿士東維拉同韋斯咸，以及歐聯險勝盧多格德斯，令人相當失望。歸根究柢因為出售阿蘇後，以為引入多位新兵，可以彌補損失，但事實剛好相反，變動太大，削弱原本凝聚力，又要重新磨合，似上季熱刺賣走加里夫巴利，「一人換全隊」嘅翻版。鋒線巴洛迪利庸碌無為，中堅洛夫雲亦唔見穩陣，最大鑊係史杜列治養傷，靠史達寧單打獨鬥，進攻變得隔靴搔癢。
歐聯英超打吡更重要

由於紅軍嚟緊惡戰連場，周六對愛華頓，下周中又要踢歐聯鬥巴素利，羅渣士喺分量最輕嘅英聯盃，應會派副選上陣，情況更令人擔憂。事實上，早啲喺呢項盃仔出局，令紅軍少一個包袱，可能反而係好事，爭勝意欲成疑。
米杜士堡當弗有衝勁

米杜士堡獲得三連勝，狀態當弗，同埋低組別球隊始終對盃賽比較有衝勁，尤其對手係傳統名牌，更加會激起佢哋鬥心。米堡近年引入多位西班牙球員，包括曾効力利物浦嘅丹尼爾艾耶拉、今季有4球進帳嘅安歷基傑基等，踢法具侵略性，足以同紅軍抗衡。