不來梅進取克敵

猪拉多纳

不來梅今季走年輕化政策成效唔錯，成隊波有活力有姿勢，之後應該會見到成績不斷上揚。今晚佢哋迎戰疲兵上陣兼有唔少傷兵嘅史浩克04，受讓絕對抵玩，1.6倍「讓球主勝」值得支持。

（有線64及203周三凌晨2:00直播）

尋日下晝講亞運足球，雖然係講烏茲別克對阿富汗嗰場，但就好開心，因為同時目擊香港點樣贏孟加拉出線16強，我哋呢次確係達到賽前部署。雖然下一場係後日下晝4點挑戰南韓，我哋都要力撐港隊打出鬥志！到時有線亞運網有免費直播，大家無論身處邊度都可以十卜！

講開部署，呢樣嘢德國人都係數一數二。德甲開咧短短1個月，今個周中即刻開快車，今晚足球台直播拜仁對柏達邦嘅同時，我哋球彩台就會直播雲達不來梅主場對史浩克04。聽晚仲有多蒙特同利華古遜分頭登場，咪走雞喇！
球員年輕夠活力

上季以第12名成績衝線嘅不來梅，佢哋今季積極大走年輕化路線，就大獲好評。德國U19前鋒戴菲沙爾基係未來希望，據聞連賓菲加同修咸頓都想斟佢，不過呢位年輕人就話仲係想留低喺度幫手。至於意大利年輕守將卡迪路拿就主動加操，希望重奪正選。年輕球員就係勝在有呢團火，依家不來梅大部分球員都係廿歲出頭，積極搏殺，相信可以踢出一番前途。

一班不來梅球員有嘅係活力，所以打快車就最合「合尺」，相反今場作客嘅史浩克04，唔單止有賀維迪斯同菲臘比辛坦拿等大批傷兵，呢場波更係佢哋7日之內第3場大戰，對球員體力同心理都係好大負荷。況且開季至今，史浩克4場作客波得1和3負，成績麻麻，今場要贏波亦有難度，試問仲有乜資格去讓人？
頂占筍盤：雲達不來梅（讓球主勝）