森林綠沉熱刺

猪拉多纳

紀念名帥哥洛夫逝世10周年

上輪英超簡直係熱門災難日，曼聯、利物浦、熱刺同愛華頓都輸波而回，其中開季係威係勢嘅熱刺自從輸比利物浦後，走勢就開始回落，上仗主場輸畀西布朗更踢到冇厘神氣，今場英聯盃喺主場面對英冠兵諾定咸森林，熱刺戰意成疑，有可能為咗專心聯賽而放棄呢個盃仔，而近況不俗及有千計專登着「綠衫」球迷撐場嘅森林，有望偷雞成功，受讓值捧。

（TVB 301周四凌晨2時45分直播）

踢波有時就係打道氣，尤其係對一啲仲未成型嘅球隊，一旦畀人打斷道氣，球員就會自亂陣腳，愈踢愈沉，依家嘅熱刺正正就係咁嘅情況，呢隊波出名換領隊當食生菜，搞到球員隔咗一排又要重新熟悉新教頭嘅踢法，熱刺高層喺上季結束後炒咗舒活，搵嚟阿根廷籍教頭普捷天奴掌軍，雖然佢喺修咸頓帶隊成績不俗，但嚟到問題多多嘅熱刺，真係好難一時三刻將隊波撥亂反正，個Form都有排執。
熱刺洩咗道氣有排執

熱刺班球員係有質素，但點樣令佢哋踢出化學作用先至係大問題，以上場對西布朗為例，熱刺嘅前後場係完全冇連貫，更唔好講佢哋可以踢得出修咸頓上季順暢嘅進攻組織，主因就係球隊仲未踢到個Form出嚟，雖然佢哋喺季初英超同歐霸共四場賽事贏晒，但畀利物浦大炒3蛋後，球員士氣、信心開始下降，進攻同防守愈踢愈亂，相信普帥都要一段時間先可以執番正隊波。

諾定咸森林依家排喺英冠第一，近十仗不敗，當然，森林球員嘅質素同熱刺梗係差九條街，但狀態、士氣同鬥志一定好過對手，加上英聯盃嘅贊助商特意為客隊球迷派發1,000件綠色衫，紀念經常着綠衫領軍嘅球會已故名帥白賴仁哥洛夫逝世十周年，今場波別具意義，森林嘅戰意肯定鮮明過要分心爭前四同歐霸嘅熱刺，讓球客勝捧得過。