中國雪恥誓頂泰國

猪拉多纳

16強遇仇家 落柯打唔衰得

國足小將誓報「6．15之恥」！今晚亞運男足爆發16強大戰，中國將會硬撼泰國爭入8強。泰國分組賽全勝氣勢如虹，不過中國主帥傅博揚言以4強為目標，日前生死戰險勝晉級士氣大振，呢班小將誓要為大國腳報番上年6月慘敗畀泰國五個一皮嘅奇恥大辱，仲有得受讓不妨揀讓球客勝。

（有線64及203台周四晚7時直播）

近年泰國足球進步神速，今次冇任何外流球員，而武里南聯守將坦基朗刑滿復出，佢哋喺分組賽全部贏晒，但睇番對手只屬印尼、馬爾代夫及東帝汶等二三流分子，因此全勝乃正常發揮，唔好睇得太高。同輕鬆出線嘅泰國不同，中國喺分組賽只得一勝一負，若非喺尾輪靠常飛亞一箭定江山以1比0擊敗巴基斯坦，已經提早返歸，但正係呢場咁艱難贏波，並終止1051日不勝紀錄，大大振奮士氣，主帥傅博更話有助球員釋放壓力，豪言以殺入4強為目標。
「6．15之恥」累甘馬曹炒魷

猶記得上年6月15日嘅熱身賽，中國國家隊竟然喺主場以1比5慘敗畀泰國U23，不但創下國足史上對泰國最大輸波比數，更令當時嘅教頭甘馬曹食無情雞。睇番泰國今屆大軍中，有9人曾參與上年屠殺國足嘅慘劇，仇人見面分外眼紅，中國一班小將毋忘「6．15之恥」，誓要為大國腳報番一戰之仇，國家體育總局副局長蔡振華更係落咗柯打：「中國隊肯定不會重演1比5嘅慘案，我相信球員會有充分準備。」傅博亦話已吸取「6．15」教訓，預計中國隊眾志成城做好防守，有力頂住泰國來襲，讓球主客和中國有得受讓，斯維力撐讓球客勝。
靈感女神莎拉是日亞足金「據」

(四)1 約旦男亞足 Vs 吉爾吉斯男亞足

約旦在今屆分組賽不失一球

(四)2 巴勒斯坦男亞足 Vs 日本男亞足

巴勒斯坦近四屆首次躋身淘汰賽

(四)3 泰國男亞足 Vs 中國男亞足

泰國今屆分組賽全勝晉級