日本火力猛拆巴冇難度

猪拉多纳

巴勒斯坦男亞足將會喺今日上演嘅16強賽事硬撼日本男亞足，兩軍同以2勝1負成績出線，但巴勒斯坦上仗連新加坡都輸得可見球隊後防唔太穩陣，面對火力強勁兼有多位主力傷愈能夠候命嘅日本，隨時被對手連環攻破大門，讓球客勝及大盤可同時兼顧。

（有線61及201台周四下午4時直播）
巴勒斯坦受壓易亂龍

巴勒斯坦男亞足喺分組賽三戰都有入波，可見進攻能力唔錯，其中首戰取得入球嘅前鋒韋達特已有代表大國腳上陣經驗；另一前鋒馬拉阿巴則喺分組賽取得2球進帳，同樣係球隊入球希望。不過，巴勒斯坦分組賽所面對嘅對手，實力難同今仗對手日本相提並論，加上球隊最近兩仗皆有失波，相信一眾前鋒今仗唔易再取得入球之餘，後防受壓隨時亂晒龍，失波嘅機會大增。

日本男亞足分組賽2勝1負以次名出線，日前以4比0擊敗尼泊爾男亞足，前鋒鈴木武藏梅開二度後暫時攻入4球，而中場中島翔哉亦連續2場有士哥，球隊攻擊火力相當唔錯。另外，近日受傷嘅中場原川力、後衞中山亮輔及室屋成傷勢唔算嚴重，相信今仗都能夠候命上陣，面對實力有所距離嘅巴勒斯坦大勝晉級冇難度，捧讓球主勝及大盤隨時「雙贏」。