泰國鬥心勁 中國冇運行

猪拉多纳

懸賞1323萬爭金牌

中國男亞足上場喺亞運分組賽幾經辛苦先擊敗巴基斯坦男亞足，以F組次名殺入淘汰賽，點知16強就遇上泰國男亞足，認真唔好彩。泰國陣中多名球員，有份踢上年6月大炒國足5:1場波，唔怪得內地傳媒都長他人志氣，話國足輸少當贏。中國未踢先輸氣勢，梗係要捧當旺嘅泰國主W，有1.92倍抵玩！

（有線64及203周四晚7:00直播）
9名球員曾「蹂躪」國足

中國上場以1:0小勝巴基斯坦，都要多謝對方多次把握唔到入球機會，先可以小組出線。16強對住泰國，中國可以話係極之唔好彩，事關呢隊泰國男亞足陣中有9位球員，有份踢上年6月以5:1「蹂躪」國足場波。大國腳都搞成咁，難怪連內地傳媒都普遍話呢班中國男亞足好難幫到國足報仇，有啲仲話唔再輸1:5已經收貨添！未踢就先話認輸，你叫中國班小將情何以堪？

佢哋今仗對手泰國男亞足雖然仲未適應到當地天氣，仲有前鋒龐布柏重傷抖5個月，但係後衞坦蘭安波監刑滿復出，加埋佢哋响分組賽3戰全勝狂入11球，就知佢哋冇受到太大影響。咁梗係啦，泰國奪冠獎金有成5,500萬泰銖（約1,323萬港元）咁多，試問班球員仲點會唔搏盡吖？
周四賽制

男亞足：今輪為16強比賽。賽事以1場決勝負，若法定時間內賽和則進行加時，再和即互射12碼分高下。

阿盃：今輪為16強比賽。賽事以一場分高下，若法定時間內打和，即互射12碼決勝負。

俄盃、挪盃、荷盃：今輪為俄盃第5圈、挪盃4強、荷盃第2圈比賽。賽事以一場決勝負，若在90分鐘內打成平手則加時再戰，再和即互射12碼分高下。

中冠盃：今輪為分組賽賽事，每組3隊，採聯賽雙循環制，每組首名將晉級8強。

葡聯盃：今輪為第2圈首回合賽事。若兩回合總比數賽和，即於次回合法定時間後互射12碼定輸贏。

南球盃：今輪為第2圈次回合賽事。若兩回合總比數賽和，先計算作客入球優惠，若未分勝負即互射12碼定輸贏。

男亞足16強