紅軍冇神冇氣 讓唔起拖肥

猪拉多纳

「歐洲賽後遺症」真係唔講得笑，上個禮拜歐聯、歐霸盃開咗波之後，各支歐戰隊伍返番英超都賴晒嘢，唔計曼城同車路士兩強相遇，利物浦、熱刺同愛華頓統統失分，都咪話唔得人驚。今個禮拜冇歐洲賽，利物浦同愛華頓可以專心搏盡呢場「默西塞德郡打吡」，「紅軍」近期表現曳踢到冇神冇氣，就算前鋒史杜列治今晚有望復出，主場對住咁高咁大嘅愛華頓都未必讓得起，一於捧1.95倍「讓球客勝」。

上季英超亞軍利物浦開季得2勝3負，5戰過後入得7球咁大把，證明蘇亞雷斯離隊對「紅軍」係幾攞命。巴洛迪利加盟後一直踢唔出應有水準，謝拉特今時今日已經變咗「謝老四」，演出冇氣冇力。
史獨復出狀態成疑

最大劑係左閘艾拔圖摩蘭奴成事不足，賽前竟然有球迷要求領隊羅渣士搵高路托尼喺「默西塞德郡打吡」擔正，淪落到要寄望呢位老將穩定防線，可想而知利物浦條後防係幾靠唔住。英國傳媒話，前鋒史杜列治已經復操，今仗或會復任正選，不過「史獨」抖咗咁耐，狀態係點真係冇人知，係咪即刻幫到「紅軍」手呢？小妹好有保留囉！
愛華頓中前場撻着晒

冇錯，利物浦今仗對手愛華頓都唔好得去邊，上輪聯賽輸完畀水晶宮後，周中又喺聯賽盃被史雲斯淘汰。之不過咁，話晒今晚都係打吡，「拖肥糖」戰將點都會加多幾錢肉緊。況且盧卡古、米拿拉斯同賴史密夫幾位中前場球員開季冇耐已經撻着晒，慢吓手今晚喺晏菲路球場偷埋利物浦雞都唔出奇呀！

（打吡激戰 今晚7:45 now621直播）
盤路解碼：愛華頓上季英超作客8勝6和5負，不敗率達74%。

Data King：打吡交手旺開大

‧雙方近6次交手，5次開出入球大。

‧利物浦近11場英超只得1場保持清白身。

‧愛華頓連續7場英超至少攻入對手2球。
乜都玩錦囊：兩隊後防穿窿博埋7+

兩軍上季同樣表現Sharp醒，但今季齊齊回落，今場打吡大戰肯定想砌低對手重振聲威，唔驚佢哋唔攻。紅軍防線依然多甩漏，拖肥糖後防就直頭穿晒窿，暫時仲做埋英超失球王添，若果覺得1.54倍入球大唔夠喉，總入球5、6、7+試吓都無妨。