謝雲奴爭氣 雲格走晒寶

猪拉多纳

由於今個周中有歐聯同歐霸關係，因此今晚歐洲各大聯賽都冇乜重要戰役，不如趁機介紹吓近期有乜嘢弗爆球隊，以及有料教頭及球員。英超有全面撻着嘅一哥車路士，由於Peter有講開意甲及法甲波，當中邊隊有料到都可清晰同大家分享，於意甲方面，梗係榜首雙雄祖雲達斯及羅馬喇。「斑馬兵團」一枝獨秀，全因冇賣走兩大能攻善守嘅中場保羅普巴及維達爾，羅馬翼鋒謝雲奴最近勇達巔峰，幾年前阿仙奴領隊雲格從里爾簽下佢，但幾年後來到「永恒之城」先至綻放光芒，兵工廠今勻走晒寶喇，呢兩支最出色嘅意甲球隊，將喺嚟緊一輪聯賽碰頭，到時真係龍虎鬥。
哥迪奧拿亂點鴛鴦

至於前熱刺領隊保亞斯，轉教辛尼特後終於重見天日，佢帶領呢支俄超班霸喺國內聯賽連場報捷之餘，喺歐聯首場分組賽照贏賓菲加，證明於英超失敗唔代表佢冇料到。相反，拜仁教頭哥迪奧拿將世界級右閘嘅拿姆放喺防中位置，簡直嘥料，未能讓呢位隊長發揮得淋漓盡致，若果佢繼續亂點鴛鴦，想重溫前任軒歷基斯帶隊榮膺三冠王嘅好夢都幾難，分分鐘未能幫人才濟濟嘅拜仁攞多個兩項錦標。至於希臘勁旅奧林比亞高斯喺歐聯首仗勇挫上屆亞軍馬體會，係奇兵一路。