華倫Fit爆剃蘇捧「讓客」

猪拉多纳

皇家蘇斯達今晚會喺西甲主場迎戰華倫西亞，皇蘇季初表現反覆，聯賽至今5戰只得4分。相反華倫西亞已經累積4連勝士氣正盛，既然「蝙蝠兵團」狀態大勇，1.5倍「讓客」當然係首選啦！

（now632台及TVB13周一凌晨1:00直播）
皇蘇半場例失波

皇蘇今戰雖然佔主場之利，但佢哋季初慢熱情況嚴重，5場聯賽場場都失波在先，其中有4次追唔番半場落後0:1，剩番嗰次對皇馬仲要開波10分鐘就已經失咗兩球，幸好換邊前追得番和2:2，反映皇蘇上半場經常遊魂，班球員要失咗波先識醒，今仗對住華倫，真係有得震無得瞓！

華倫同皇蘇剛剛相反，近4場聯賽上半場都取得領先優勢，其中3場更領先兩球。「蝙蝠兵團」中場柏利祖既可以穿針引線，亦有唔錯把握力，除此之外，年輕箭頭柏高艾卡沙已經連續4仗有「士哥」，腳風順到無朋友，華倫近4場每場都起碼入3球唔係冇道理嘅！更何況呢班波今季防守力亦有提升，開季至今5仗只失2球，今晚作客皇蘇莫講話受讓，就算平手都有權索埋，1.5倍「讓客」唔捧都對自己唔住啦！