曼城羅馬搶攻大亂鬥

猪拉多纳

今輪歐聯「死亡E組」重頭戲，「藍月亮」曼城主場迎戰「雌狼」羅馬，「藍月亮」分組賽首戰不敵拜仁慕尼黑，相反「雌狼」清風送爽大炒莫斯科中央陸軍5比1，即係話，曼城今晚非勝不可，否則出線現危機，球隊求勝心切應會採取主攻，入球大值得一博。

（有線64及203台周三凌晨2時45分直播）
「藍月亮」4箭齊發搏命

曼城上場聯賽對侯城其實贏得驚險，今夏加盟「藍月亮」、成為英超史上最貴後衞嘅文加拉，竟然兩度犯錯搞到球隊一度被逼和2比2，不過曼城嘅恐怖之處就係從來都唔驚入唔到波，阿古路、大衞施華、耶耶托尼個個都能以一己之力製造入球，當守得到呢3位球員，又會走漏迪斯高同林柏特呢兩位高質球員，最尾佢兩個先後士哥助球隊擊敗侯城4比2。

「藍月亮」今場對羅馬嘅關鍵一戰，門將赫特應會復任正選，而阿根廷中堅迪米捷利斯就會頂替文加拉，而最重要嘅前場攻擊組合，包括阿古路、迪斯高等四人料會繼續拍住上，火力依然超強。

羅馬開季六連勝，謝雲奴、拿積、比真歷、迪斯度等攻擊球員個個狀態托弗，頻頻入波，但鑑於球隊防守力麻麻，預計羅馬會以攻代守同曼城鍊過，大盤值捧。