車路士精打細算

猪拉多纳

砌完士砵亭鬥兵工廠

歐聯G組估唔到競爭咁激烈，經過首輪賽事後出現四隊同分，連車路士都未能旗開得勝。不過車仔該仗失分並唔難理解，畢竟之後要鬥曼城。今次情況類似，車仔將於周日英超硬撼阿仙奴，領隊莫連奴最識計數，連場惡戰下，唔會亂嘥體力，就算贏波都係點到即止。車路士今晚作客士砵亭，屬於開細格局。

（有線61及201台周三凌晨2時45分直播）

車路士今季多咗迪亞高哥斯達、法比加斯後，進攻係改善咗，但整體人腳唔算充裕，上輪對史浩克04焗住畀「迪哥」做後備休息。基於有兵工廠後顧之憂，預料莫連奴可能又會輪換部分正選。事實上，以莫帥過去穩陣作風，作客亦唔會亂攻，應會睇定打快速反擊。
靠拿尼難破車仔大門

另外，莫連奴對於祖國球隊士砵亭實力瞭如指掌，加上車仔喺首場分組賽失分，主場畀史浩克逼和，為搶回出線主動權，相信今仗要贏唔成問題，但領先後好可能歎慢板，以免球員消耗太多體力，影響對阿仙奴嘅英超大戰。

士砵亭今非昔比，級數同車仔有明顯距離，目前陣中最出名球員都只係曼聯棄將拿尼，預計今場都會處於被動。睇番佢哋今季表現麻麻，喺葡超亦只位列第七，入波數字亦少，今仗難以威脅車仔大門，一於吼實入球細。