馬體會未執掂祖記+1咪走寶

猪拉多纳

上屆亞軍馬德里體育會，今晚喺A組次輪分組賽返主場迎戰意甲班霸祖雲達斯。雖然馬體會首輪落筆打三更，可惜射手文迪蘇傑傷咗一輪未操，想搶攻爭勝都有難度，相反「斑馬兵團」開季後未失過波，防線堅穩陣，仲有得受讓咁筍，讓球客勝咪錯過。

(有線18台周四凌晨2時45分直播)

馬體會今夏遭「煎皮拆骨」，迪亞高哥斯達、菲臘路爾斯、韋拿、泰拔高圖爾斯等相繼離隊，補入嘅基沙文、文迪蘇傑、魯爾占美尼斯質素唔曳，但始終需要時間去磨合，首輪歐聯更意外地作客輸畀希臘地頭蟲奧林比亞高斯，令人跌晒眼鏡。更弊係嗰場文迪蘇傑仲被打崩鼻需要做手術，抖咗一輪，日前聯賽對西維爾雖有披甲但表現麻麻，睇嚟唔多弗靠唔住喎，況且防線冇上季咁穩健，今仗焗攻隨時兩頭唔到岸。
阿里基揸弗注重防守

其實祖雲達斯亦有中場派路及後衞馬田卡沙利斯養傷，好彩前鋒泰維斯弗到漏油，不但上仗聯賽對阿特蘭大梅開二度，首輪歐聯對馬模亦省兩粒，而且「斑馬兵團」自阿里基接手後更加注重防守，開咧後六場正式比賽贏晒之餘，仲一球不失，有傳高層快將同泰維斯、門將保方及中場新星保羅普巴續約，有助提升士氣，由於今仗搶一分亦冇蝕底，勢必使出看家本領，以穩健嘅防守同馬體會周旋，讓球主客和仲受讓一球，梗係揀祖記讓球客勝喇。