紅軍態沉作客讓唔起 撐巴素利搶到分冇死

猪拉多纳

巴素利喺分組賽首輪畀皇馬怒炒5:1，今戰返主場迎戰利物浦不容有失。好在「紅軍」近期表現唔多掂，今輪去到巴素利主場，就算前鋒史杜列治有機會喺呢場復出，作客都未必攞到3分，咁嘅環境最好係撐1.83倍嘅「讓主」！

（有線61及201周四凌晨2:45直播）
利物浦3戰「不勝」

巴素利上輪畀「銀河艦隊」嘅進攻「同花順」大炒，認真冇陰功，不過正因為輸得咁慘，今戰返到主場絕對要踢番場爭氣波，雖然中場「大腦」馬些路戴亞斯仲坐緊波監，後衞伊雲洛夫亦有傷仲未出得，但以對手利物浦今時今日咁曳嘅狀態，巴素利喺主場搶到分絕對唔出奇。

「紅軍」今夏喺「咬人蘇」轉投巴塞之後，都使咗一大舊錢買入唔少人，可惜表現同上季簡直蚊髀同牛髀。領隊羅渣士用過菱形4-4-2同4-2-3-1陣式，不過始終打唔出應有水準，連同英聯盃在內，佢哋已經有3場冇辦法喺法定時間K.O.對手，今仗就算有史杜列治復出，睇怕都好難有咩起色，讓波玩唔過。